Դավոսում այսօր մեկնարկում է Համաշխարհային տնտեսական համաժողովը: Այնտեղ են արդեն հավաքվել աշխարհի քաղաքական և բիզնես էլիտայի ներկայացուցիչները: Հերթական հանդիպումը կանցնի «Կայուն դինամիկա» նշանաբանով: Այս մասին հայտնում է Vesti-ն:
Դավոսի օդային տարածքը փակել են: 4000 զինվորականներ շրջափակել են շվեյցարական փոքրիկ քաղաքը: Աղքատության թեման բարեկեցիկ Դավոսում միշտ էլ քիչ համոզիչ է հնչում, սակայն ամեն տարի ինչ-որ մեկը փորձում է: «Պարզապես ձեր անցած տարվա աշխատավարձի ¼-ը հատկացրե´ք, և աղքատությունը մեկընդմիշտ կվերանա»,- համաժողովի բացման նախաշեմին աշխարհի ամենահարուստ 100 մարդկանց էր դիմել «Օքսֆամ» բարեգործական կազմակերպությունը:
Նույնիսկ քաղաքական գործիչներին ու բանկիրներին է խթան անհրաժեշտ. նրանք հոգնել են աշխարհը ճգնաժամից դուրս քաշելուց: Դավոս-2013-ի օրակարգը ձևավորելիս կազմակերպիչները մտածել են վերականգնողական միջոցառումների մասին: Չայկովսկի, Ռախմանինով, ռուսական բալալայկա՝ համաժողովի մեկնարկի պատվին համերգը կբացի Վլադիմիր Սպիվակովի «Մոսկվայի վիրտուոզներ» նավագախումբը:
«Կարծում եմ, շատ քաղաքական գործիչներ պարզապես սպառվել են, քանի որ ստիպված են եղել բախվել բազմաթիվ խնդիրների: Մեր նպատակն է նրանց ուժերը վերականգնելը»,- ասել է Դավոսի համաշխարհային տնտեսական ֆորումի նախագահ Կլաուս Շվաբը:
Համաժողովի առաջին լիագումար քննարկումը կծավալվի «Ռուսաստանի զարգացման սցենարների» շուրջ, դրանք երեքն են, սակայն ըստ մասնագետների՝ ոչ այնքան լավատեսական:
Դավոս-2013-ի ընդհանուր թեման կայուն դինամիկան է: Չնայած լավատեսական նշանաբանին, տնօրինությունը կոչ է անում խոսել նոր՝ բնապահպանական ճգնաժամի մասին:
Փորձագետները կարծում են, որ տնտեսության առողջացման համար 13 տրիլիոն դոլար է անհրաժեշտ: Սակայն նրանք ամեն տարի սխալվում են: 2011-ին նրանք խոստացել էին, որ եվրոգոտին ճգնաժամից դուրս գալու դրական ուղիով կշարժվի:
Արդեն ավանդական է դարձել՝ ֆորումի մասնակիցների քննարկումներին համաշխարհային բորսաները չեն խանգարի: Նրանք իրենց հավուր պատշաճի կդրսևորեն 5 օրերին՝ հանգիստ թողնելով շվեյցարական գյուղում միավորված բանկիրներին, քաղաքական գործիչներին և տնտեսագետներին: «Հաշտեցումը» կավարտվի երկուշաբթի առավոտյան:
Այս տարի նույնպես ՀՀ ղեկավարները Դավոսի համաժողովը չեն «պատվի» իրենց ներկայությամբ: «Առաջին լրատվական»-ի տեղեկություններով՝ ո՛չ Սերժ Սարգսյանը, ո՛չ Տիգրան Սարգսյանը չեն մեկնելու Դավոսի հեղինակավոր համաժողովին: Հիշեցնենք, որ 2012-ին իրենց չմասնակցելը Հայաստանի ղեկավարությունը պատճառաբանեց պետական միջոցները խնայելու հանգամանքով, ինչպես նաև նշում էին, թե Դավոսյան համաժողովը ՀՀ-ի համար այնքան էլ կարևոր չէ: Անցած տարիների ընթացքում ՀՀ-ն ընդամենը 1-2 անգամ է մասնակցել միջազգային այս համաժողովին:
