Վերջին շրջանում հայաստանյան իշխանությունները սկսել են մեծ ուշադրություն դարձնել գյուղին` վարչապետը գյուղում ասուլիս է անում, խոսում է կովերին կթելու մեթոդների մասին, Հովիկ Աբրահամյանը պարարտանյութ է խոստանում գյուղացիներին, Սերժ Սարգսյանն էլ կարգադրել է բոլորին հայացքով շրջվել դեպի գյուղ:
Քաղաքագետ Երվանդ Բոզոյանի գնահատմամբ, այդ ամենը ծիծաղելի է, և երբ իշխանությունը տեսնում է, որ հազարավոր մարդիկ հավաքվում և պահանջներ են ներկայացնում հանրահավաքներին, ապա սկսում են ինչ-որ քայլեր ձեռնարկել. «Իսկ քանի որ նրանք պատրաստ չեն լուրջ քայլերի, ապա սկսում են հրապարակավ բեմականացումներ իրականացնել: Սա դեռևս խորհրդային տարիներից եկած փորձ է` այն ժամանակ էլ կար գյուղական ժամ հաղորդաշարը, բայց դե բոլորն էլ շատ լավ հասկանում են, որ գյուղական միջավայրում ասուլիս տալով` գյուղացուն ավելի հոգեհարազատ չես դառնա, չես կիսի նրա պրոբլեմները»:
«Առաջին լրատվականի» հետ զրույցում Բոզոյանը նկատեց, որ արմատական բարեփոխումներ չեն արվում և արմատական խնդիրներն էլ հաշվի չեն առնվում, իսկ ֆոտոխցիկների առջև ժպտալով և բարի խոսքեր ասելով` գյուղի խնդիրները չեն լուծվում:
Քաղաքագետը նաև նկատեց, որ միայն գյուղը չէ, որ ունի խնդիրներ, այլ բոլոր ոլորտներում էլ ճգնաժամային իրավիճակ է, սակայն իշխանությունները այդ առումով որևէ քայլ չեն իրականացնում, բացի թատերական ներկայացումներից. «Այդ ամենը կրկեսին փոխարինող երևույթ է դարձել»:
