Աֆղանստանի թմրանյութերի դեմ պայքարի նախարարությունը հայտարարել է, որ Ռուսաստանը անհրաժեշտ գործողություններ չի ձեռնարկում թմրասպառնալիքի դեմ և Աֆղանստանին բավարար օգնություն չի ցուցաբերում թմրանյութերի արտադրության դեմ պայքարում: Այս մասին հայտնում է RIA Novosti-ն:
Փոխնախարար Իբրահիմ Ազհարը մեկնաբանել է ՌԴ-ի Թմրանյութերի վերահսկողության դաշնային ծառայության ղեկավար Վիկտոր Իվանովի հայտարարությունն այն մասին, որ Աֆղանստանում ՆԱՏՕ-ի զորակազմի գտնվելու 11 տարիներին թմրանյութերի արտադրությունն ու ցանքատարածությունները միայն ավելացել են:
Ազհարի խոսքով՝ ռուսական կողմը նման հայտարարություն է անում իր հեղինակությունը պաշտպանելու համար: Նրա խոսքով՝ ՌԴ-ում աֆղանական թմրանյութերի պահանջարկը չափազանց մեծ է, սակայն ռուսները լուրջ աշխատանք չեն տանում այդ երևույթին հակազդելու համար:
Աֆղան փոխարտգործնախարարի տվյալներով՝ ամեն տարի Աֆղանստանից արտերկիր է մատակարարվում 375 տոննա հերոին, որից ավելի քան 95 տոննան գնում է Ռուսաստան:
Նշենք, որ ներկայում Աֆղանստանն ու Ռուսաստանը խորհրդակցություններ են անցկացնում թմրանյութերի դեմ օրենսդրության կատարելագործման վերաբերյալ, փոխանակվում հետախուզական տեղեկություններով, անցկացնում նաև թմրալաբորատորիաների վերացման համատեղ բարեհաջող օպերացիաներ, որոնք Ազհարի խոսքով՝ բավարար չեն:
