«Մի դիմավորեք Ամանորը քաղցած, սնվեք դանդաղ, հաճույք ստացեք սնունդից, ունեցեք չափի զգացողություն»,- «Առաջին լրատվական»-ի հետ զրույցում մի քանի խորհուրդ տվեց Հայաստանի Դիետոլոգների ասոցիացիայի ղեկավար, սննդաբան Գայանե Ղազարյանը՝ ներկայացնելով այս օրերին ճիշտ սնվելու առանձնահատկությունները:
Նա նկատեց, որ վերջին տարիներին մարդիկ հասկացել են՝ կարևորը ոչ թե ճոխ սեղաններն են, այլ լավ տրամադրությունն է, ուստի սխալ կլինի այս տոն օրերին ինչ-որ խորհուրդներ տալ, արգելել այս կամ այն սնունդը: «Ես խորհուրդ եմ տալիս ազգաբնակչությանը, որպեսզի չկորցնի չափի զգացումը, սնվի միայն թարմ սննդամթերքով ու ուտեստներով և խմի միայն որակյալ խմիչք՝ խրոնիկ հիվանդությունների սրացումից զերծ մնալու համար»,- ասաց նա:
Գայանե Ղազարյանը խորհուրդ տվեց քաղցած չդիմավորել Ամանորը, սեղանից օգտվելիս շատ օգտագործել կանաչեղեն ու բանջարեղեն, ուտել շատ դանդաղ, որպեսզի հնարավոր լինի հաճույք ստանալ կերակրատեսակից: «Որպեսզի որոշեք չափաբաժինը, առաջարկում եմ օգտագործել ափսեի մեթոդը, մտովի ափսեն չորս-հինգ մասի բաժանեք և այդպես դասավորեք սնունդը ափսեում»,- ասաց սննդաբանը՝ շարունակելով, որ ստամոքսը դրանից չի ծանրաբեռնվի:
Գայանե Ղազարյանը նաև խորհուրդ տվեց քաղցր ըմպելիքներ օգտագործելիս ավելացնել ջուր՝ այդպիսով նվազեցնելով դրա կալորիականությունը: «Այս մեթոդը կօգնի արագ լցնել ստամոքսը և չի չարաշահի ստամոքսը»,- ասաց նա: Սննդաբանն ասաց, որ խորհուրդ չի տրվում մեկ օրվա ընթացքում օգտագործել տարբեր ալկոհոլային և ոչ ալկոհոլային խմիչքներ: Նրա դիտարկումներով՝ պետք է օրն ավարտել այն խմիչքով, ինչով սկսվել է:
Նա նաև խորհուրդ տվեց ամանորյա սեղանին մատուցել միայն թարմ ուտելիք, որի համար պետք չէ սնունդը պաշարել, այն պետք է պատրաստել առավելագույնը երկու օր սեղանին մատուցելու հաշվարկով և ոչ ավելի, քանի որ այդ դեպքում այն արդեն վտանգավոր է:
Առաջարկում ենք մանրամասներին ծանոթանալ տեսանյութի միջոցով: