Եթե Ուրմիա լիճը ցամաքի, Իրանի տարածքի մեկ քառորդ մասում ավազի և աղի փոթորիկներ կբարձրանան, ասել է Իրանի օվկիանոսագիտության ազգային ինստիտուտի նախագահ Վահիդ Չեգինին: Այս մասին հաղորդում է Trend-ը՝ հղում անելով IRNAգործակալությանը:
Նրա խոսքով՝ Ուրմիայի ցամաքելով Մազանդարա, Գիլան, Զենջան, Արևելյան Ադրբեջան, Արևմտյան Ադրբեջան, Արդեբիլ, Թեհրան, Գազվին և այլ նահանգներում էկոլոգիական աղետ կլինի:
Ուրմիայի ցամաքելու հարցում մեծ դեր ունի երաշտը, նշել է Չեգինին:
«Ներկայումս Իրանի էկոլոգիայի և էներգետիկայի նախարարություններում, ծայրամասային մարզերի գործադիր մարմիններում այս վտանգի կանխարգելմանն ուղղված աշխատանքներ են տարվում»,- ասել է Չեգինին:
Ըստ պաշտոնական վիճակագրության՝ Ուրմիա լճի ջրային մակերեսի 70 տոկոսն արդեն ցամաքել է: ներկայումս ջրի յուրաքանչյուր լիտրում 400 գրամ աղ կա:
Ուրմիա լճի տարածքը մոտ 6000 քառակուսի կիլոմետր է: Շրջակա միջավայրի հարցերով մասնագետները նշում են, որ լիճը փրկելու համար Իրանի կառավարության ձեռնարկած միջոցառումները բավարար չեն:
Ավելի վաղ Իրանի Արևմտյան Ադրբեջան նահանգի շրջակա միջավայրի պահպանության կազմակերպության գլխավոր տնօրեն Հասան Աբաս Նեջադը հայտարարել էր, որ լիճը փրկելու համար տարեկան 3.1 մլրդ խմ ջուր է անհրաժեշտ: Լճի յուրաքանչյուր լիտրում կա 330 գրամ աղ՝ նախկինի 160-170 գրամի փոխարեն:
2010-ին նախագահ Մահմուդ Ահմադինեժադի ու կառավարության անդամների Թավրիզ այցի ժամանակ հաստատվել է Արազ գետից Ուրմիա լիճ 600 մլն խորանարդ մետր ջուր տեղափոխելու ծրագիրը, որի իրականացման համար նախատեսված է հատկացնել 1.2 մլրդ դոլար:
2011-ի սեպտեմբերին Իրանի կառավարությունը 900 մլն դոլար է հատկացրել լճի
ցամաքումը կանխելու համար:
