Դեմոկրատական կուսակցության ներկայացուցիչները պատրաստել և ներկայացրել են ԱՄՆ-ի պետական պարտքի առաստաղից հրաժարվելու օրինագիծը, տեղեկացնում է Associated Press-ը:
Այդ քայլը նրանք բացատրում են նրանով, որ պետական պարտքի սահմանը չի կատարում ծախսերը զսպելու խնդիրը:
ԱՄՆ-ի պետական պարտքի թույլատրելի սահմանը անցած տարվա դեկտեմբերի 31-ի դրությամբ 16,394 միլիարդ դոլար է կազմում:
Միևնույն ժամանակ, պետական պարտքի առաստաղի հարցը հանրապետականների կողմից որպես քաղաքական «շանտաժ» է օգտագործվում:
Եթե հանրապետականները շարունակեն պնդել իրենց դիրքորոշումը, ապա ԱՄՆ-ն կվերածվի աշխարհի ամենախոշոր չվճարողի, որը բնականաբար կուժեղացնի հասարակության կողմից ճնշումները:
Հանրապետականների և դեմոկրատների միջև ապագա քննարկումները շատ թեժ են լինելու:
Տարածված կարծիք կա, որ Օբաման և Կոնգրեսը արդյունքում ծախսերի վերաբերյալ համաձայնության կգան, որը թույլ կտա բարձրացնել պետպարտքի լիմիտը:
Սակայն խնդիրն այն է, որ հանրապետականները, ամենայն հավանականությամբ, չեն համաձայնի ծախսերի 1,2 տրիլիոն կրճատմանը: Այժմ նրանք ցանկանում են կոնկրետ ծրագրեր կրճատել, այլ ոչ թե ծախսերի ընդհանուր ծավալը: Առաջարկվում է առաջին հերթին կրճատել պաշտպանության ծախսերը:
Իսկ Օբաման ցանկանում է որոշ կրճատումներ փոխարինել հարկերի լրացուցիչ բարձրացմամբ:
