ՀՀ կրթության և գիտության նախարար Արմեն Աշոտյանը այսօր լրագրողների հետ հանդիպմանը պատասխանեց նաև Հայոց լեզվի ու գրականության քննության շտեմարաններում տեղ գտած թերացումներին ու անճշտություններին վերաբերող հարցին՝ նկատելով, որ անցած տարի այդ շտեմարաններից ստացված բողոքները ևս մեկ անգամ ապացուցում են, որ «շտեմարանը ճիշտ եղանակ է»:
ԿԳ նախարարի խոսքով՝ եթե չլինեին որոշ թեստային առաջադրանքների հետ կապված հանրային քննարկումները, որևէ մեկս երաշխավորված չէր լինի, որ դրանք չէին սպրդի քննաթերթիկներ: «Այս դեպքում մենք ունենք հնարավորություն` մինչև քննաշրջան մաքրելու քննական առաջադրանքները վիճահարույց, դպրոցական ծրագրերից դուրս, ինքնանպատակ բարդեցված և տվյալ առարկայի իմացության հետ որևէ կապ չունեցող առաջադրանքներից»,- համոզմունք հայտնեց Ա. Աշոտյանը:
Նա նաև խոստովանեց, որ միանալով հնչեցված մտահոգություններին՝ իր «ձայնը միացրել է» մտահոգ դիմորդներին և ԳԹԿ-ին խնդրել ու առաջարկել վերանայել «Շտեմարան»-ում առկա վիճահարույց հարցերը:
«Իրենք այսօրվանից մասնագիտական քննարկումներ են հրավիրելու, որպեսզի կարողանան իրականում զատել բարդ, բայց ծրագրի շրջանակում գտնվող թեստը ծրագրից դուրս գտնվող ու գիտելիքը չստուգող թեստերից»:
Նա խոստացավ հետևողական լինել, որ քննական թերթիկներում որևէ անորակ, ցածրորակ, սխալ կազմված թեստ չլինի:
