Մարդին մարզից Թուրքիայի խորհրդարանի պատգամավոր, քրդամետ «Խաղաղություն և ժողովրդավարություն» կուսակցության անդամ Ահմեդ Թյուրքը հանդես է եկել սենսացիոն հայտարարությամբ: Ըստ նրա՝ Փարիզում 3 քուրդ կին ակտիվիստների սպանության հետևում հավանաբար կանգնած է Իրանը: Այս մասին գրում է MK-Turkey-ը:
Թյուրքը, որը վերջերս է հանդիպել Քրդստանի աշխատավորական կուսակցության ցմահ ազատազրկված առաջնորդ Աբդուլլահ Օջալանի հետ` բանակցելու ահաբեկիչների զինաթափման շուրջ, Իրանը մատնանշել է որպես սպանությունների հնարավոր պատվիրատու:
Թյուրքը հայտարարել է, որ այս անգամ սա թուրքական պետության ձեռքի գործը չէ, այլ այն երկրներից մեկի հատուկ ծառայությունների ձեռքի գործն է, որոնք չեն ցանկանում տեսնել Թուրքիային որպես մերձավորարևելյան տարածաշրջանի միակ առաջնորդ:
Նրա կարծիքով՝ քրդական հարցի լուծումը կարող է Թուրքիային դարձնել տարածաշրջանի թիվ մեկ տերություն: «Այդ իսկ պատճառով Իրանը կարող է պատասխանատվություն կրել այդ սպանության համար: Դա տեղի է ունեցել նաև նախկինում»,- հայտարարել է քուրդ քաղաքական գործիչը: Նա նշել է, որ իր հայտարարությունը ոչ թե մեղադրանք է, այլ կատարվածի հնարավոր վարկածներից մեկը:
Մի քանի օր առաջ թուրքական հեռուստաալիքներից մեկի հետ հարցազրույցի ժամանակ Թյուրքը հայտարարել էր, որ Օջալանն իրեն նախազգուշացրել է քրդական հարցի լուծման մեջ Իրանի հնարավոր բացասական դերի մասին:
