Թևավորների պաշտպանները Չինաստանի խոշորագույն Պոյանհու քաղցրահամ լճում չվող թռչունների պաշտպանության վարչության աջակցությամբ և բարեգործական միջոցներով կառուցել են երկրում առաջին հիվանդանոցը չվող թռչունների համար:
«Այդ հիվանդանոցում մի քանի բաժանմունք է գործում՝ բուժ-ախտորոշման, ինտենսիվ թերապիայի, բժշկական վերականգնման, կա հիվանդասենյակ, նաև՝ վերականգնման կենտրոն` բաց երկնքի տակ, և լճակ»,- ասված է գործակալության հաղորդագրության մեջ:
Բուժհաստատությունը կարող է միաժամանակ ընդունել մինչև 200 վիրավոր և հիվանդ թռչուն` փոխանցում է «Նովոլիտիկա»-ն: Սպասվում է, որ հետագայում հիվանդանոցի աշխատակիցները թռչուններ կբուծեն, կընտելացնեն նրանց, կզբաղվեն նրանց մոնիթորինգով:
Հիվանդանոցը կառուցվել է թևավորների 70-ամյա սիրահար Լի Չունյժուի նախաձեռնությամբ և մասամբ նրա միջոցներով:
Կլիմայական լավ պայմանների և առատ կերի շնորհիվ հոկտեմբերից Պոյանհու է թռչում մինչև 700 000 չվող թռչուն` Մոնղոլիայից, Ճապոնիայից, ԿԺԴՀ-ից, Հյուսիսարևելյան և Հյուսիսարևմտյան Չինաստանից:
