Ֆրանսիան հետաքրքրված է Թուրքիայի միջուկային նախագծերով՝ երեքշաբթի Ստամբուլում լրագրողներին հայտնել է Ֆրանսիայի արտաքին առևտրի նախարար Նիկոլ Բրիկը: Այս մասին փոխանցում է «Անադոլու» գործակալությունը:
«Մենք հետաքրքրված ենք Թուրքիայում միջուկային նախագծերով: Մենք ցանկանում ենք Թուրքիայի հետ մեր հարաբերությունները կրկին սերտացնել»,- ասել է նախարարը:
Նրա խոսքով՝ առևտրային հարաբերությունները կարող են Թուրքիային և Ֆրանսիային օգնել թուլացնելու քաղաքական լարվածությունը: Նախարարը հավելել է նաև, որ երկու երկրների հարաբերությունները հիմնված են եղել տնտեսական համագործակցության վրա:
«Թուրքիան մեզ պետք է, և ես կարծում եմ, որ Թուրքիան նույնպես ունի այնպիսի խոշոր գործընկերոջ կարիք, ինչպիսին Ֆրանսիան է»,- ասել է նախարարը:
Բրիկը նշել է, որ Թուրքիայի և Ֆրանսիայի միջև առևտրի ծավալը կազմում է 15 միլիարդ եվրո՝ հավելելով, որ իր այցն ուղղված է այդ ցուցանիշի բարձրացմանը:
Այսօր նա կհանդիպի իր թուրք գործընկերոջ և Թուրքիայի էներգետիկայի նախարարի հետ:
