Եվրախորհրդարանի պատգամավորները կտրուկ արտահայտություններ են արել նիստերին ԵՄ արտաքին հարցերի գլխավոր հանձնակատար Քեթրին Էշթոնի հաճախակի բացակայությունների վերաբերյալ, նրան մեղադրել են խորհրդարանի նկատմամբ անհարգալից վերաբերմունք դրսևորելու մեջ։ Այս մասին հաղորդում է Deutsche Welle-ն։
ԵՄ ԱԳ նախարարը հանել է չորեքշաբթի օրվա համար նախատեսված Սիրիային վերաբերող քննարկումները, ինչն էլ պատգամավորների դժգոհության պատճառ է դարձել։ ԵԽ նախագահ Մարտին Շուլցը նշել է, որ ոչ մի ազգային խորհրդարան չէր հանդուրժի որևէ նախարարին հղած հրավերների անընդհատ մերժումը, ԵԽ-ն նույնպես չի հանդուրժի ԵՄ արտաքին հարցերի գլխավոր հանձնակատարի անհարգալից վերաբերմունքը։
Ֆրանսիացի պահպանողական պատգամավար Առնո Դանժանը նշել է, որ Էշթոնն այդ կերպ իր դժգոհությունն է հայտնում Ֆրանսիայի կողմից Մալի զորք ուղարկելու դեմ։ Դանժանն ափսոսանք է հայտնել, որ չեն կարողանում այդ հարցը քննարկել Էշթոնի հետ։