Վերջին ամիսներին նավթի գինը շեշտակի աճել է արաբական երկրներում տեղի ունեցող իրադարձությունների հետևանքով, և այդ ամենից, իհարկե, շահում են նավթային ռեսուրսներով հարուստ երկրները: Մեր հարևան Ադրբեջանը ևս այդ երկրների թվին է պատկանում:
Քաղաքագետ Հրանտ Մելիք-Շահնազարյանի գնահատմամբ, Ադրբեջանի պետական եկամուտների զգալի մասը ծառայում է ռազմական կարիքները հոգալուն, և ակնհայտ է, որ ինչքան ավելանա եկամուտը, այնքան կավելանա սպառազինությունը, ինչն էլ Ադրբեջանին վստահություն է տալիս ռազմատենչ հայտարարություններ անելու համար:
Սակայն, ըստ քաղաքագետի, ներկայումս Ադրբեջանը ռազմական հայտարարություններով ավելի շատ ոչ թե նպատակ ունի հայկական կողմին վախեցնել, որքան մեծացնել միջազգային հանրության ներգրավվածությունը Արցախի հիմնախնդրի մեջ:
«Ադրբեջանը շատ լավ հասկանում է, որ ինչքան միջազգային հանրության ազդեցությունը մեծանա մեր տարածաշրջանում, այնքան քաղաքական առևտրի հնարավորությունը կշատանա, ոչ թե ռազմական»,- «Առաջին լրատվականի» հետ զրույցում կարծիք հայտնեց Հրանտ Մելիք-Շահնազարյանը: