Georgian Airways ավիաընկերությունն ուրբաթ օրվանից վերսկսում է ավիաչվերթները Թբիլիսի-Մոսկվա ուղղությամբ: Այս մասին փոխանցում է Trend գործակալությունը:
Ինչպես լրագրողներին հայտնել են ընկերությունում, բանակցություններ են կայացել Վրաստանի կառավարության հետ, որից հետո ընդունվել է թռիչքների վերսկսման մասին որոշում: Ավիաընկերության պահանջները մասամբ բավարարվել են:
Georgian Airways-ի ներկայացուցիչները մի քանի օր է՝ բողոքի ակցիաներ են անցկացնում: Նրանք ներկայացրել են 7 պահանջ՝ շտապ կերպով չեղարկել Ռուսաստանին ուղղած հուլիսի 8-ի նոտան, որով ռուսական ավիաընկերությունները ստացել են Թբիլիսի-Մոսկվա-Թբիլիսի ուղղությամբ թռիչքների անսահմանափակ իրավունք, վերականգնել ավիահաղորդակցությունը Ռուսաստանի հետ՝ համապատասխան այն պայմանների, որոնք գործել են մինչ 2006 թվականի նոյեմբերին թռիչքների դադարեցումը, բանակցություններ անցկացնել Ռուսաստանի հետ և քննարկել հաջորդ տարվա ամռանը թռիչքների գրաֆիկը, վերանայել Ռուսաստանի այլ քաղաքներ թռիչքների հնարավորությունը:
Ավիաընկերությունը պահանջում է նաև Ավիացիայի գործակալությունն առանձնացնել էկոնոմիկայի նախարարությունից, քանի որ վերջինս ի վիճակի չէ լուծելու ավիաընկերություններին անհանգստացնող խնդիրները:
Ընկերության ներկայացուցիչները նաև պահանջում են Ավիացիայի գործակալությունից հեռացնել նախկին իշխանությունների նշանակած կադրերին, փոխել նախկին ռեժիմի կողմից ընդունված նորմատիվ ակտերը և վերականգնել ընկերության՝ առաջատարի կարգավիճակը, որը չեղարկվել էր նախկին իշխանությունների կողմից:
