Վրաստանում շուրջ մեկ միլիոն քաղաքացի ստորագրել է դիմում, որը պահանջում է երկրի նախագահ Միխեիլ Սաակաշվիլիի հրաժարականը: Այս մասին հաղորդում է ITAR-TASS-ը՝ վկայակոչելով «Հանուն հանրության իրավունքների միաբանության» հասարակական կազմակերպության ղեկավար Միխայիլ Անդգուլաձեին:
Նա նշել է, որ այս ստորագրությունները վերջին 2.5 ամսվա ընթացքում Վրաստանի տարբեր շրջաններում հավաքել են մի քանի հասարակական կազմակերպություններ: Նրա խոսքերով՝ դրանք վկայում են բնակչության մեծ մասի կամքն այն մասին, որ Սաակաշվիլին պետք է լքի նախագահի պաշտոնը:
Անդգուլաձեն նշել է, որ հունվարի 20-ին լրանում է Սաակաշվիլիի երկրորդ նախագահության երդմնակալության հինգ տարին, և նա պետք է հրաժարական ներկայացնի:
«Եթե նա չլքի պաշտոնը, ապա հունվարի 20-ին Թբիլիսիում և Վրաստանի մի շարք այլ քաղաքներում տեղի կունենան լայնածավալ խաղաղ ակցիաներ՝ Սաակաշվիլիի հրաժարականի պահանջով»,- հավելել է նա:
Դրա հետ մեկտեղ Սաակաշվիլին հայտարարում է, որ մտադիր չէ արտահերթ հրաժարական ներկայացնել և նշում է, որ նախագահական ընտրությունները կայանալու են 2013 թ. աշնանը:
Նշենք, որ Վրաստանում բնակվում է 4.5 միլիոն մարդ, որից 3 միլիոն 613 հազարն ունի ընտրական իրավունք:
Ստորագրահավաքն իրավաբանական ուժ չունի:
