Դժբախտ դեպքեր են լինում նաև զորավարժությունների ժամանակ, որոնք նաև զինվորական բարձրագույն կրթություն ստացած զինվորականների կողմից են թույլ տրվում: Տվյալ դեպքում խոսքը Ապարանի բնակիչ, Վազգեն Սարգսյանի ռազմական ինստիտուտը 7 տարի առաջ ավարտած, 29-ամյա Աղվան Դարբինյանի մասին է:
Դատական ակտից տեղեկանում ենք, որ 2010թ. սեպտեմբերի 7-ին, ժամը 06:30-ին ՊՆ N զորամասի անձնակազմին տրվել է տագնապ ազդանշանը` զորավարժություններ կատարելու նպատակով: Ըստ զորավարժության պլանի` անձնակազմը ստացել է զենք, ռազմական հանդերձանք և դուրս եկել նստեցման շրջան: Այնուհետև անձնակազմը կատարել է ռազմերթ դեպի կենտրոնացման շրջան: Կենտրոնացման շրջանում 2-րդ հետախուզական վաշտի 1-ին խումբը` ավագ լեյտենանտ Աղվան Դարբինյանի գլխավորությամբ, խնդիր է ստացել մեկնել Սոթքի լեռնանցք և ծավալել դիտակետ: Ստացած խնդիրը կատարելու նպատակով խումբը մեկնել է Սոթքի լեռնանցք և սպասել հետագա առաջադրանքի: Նույն օրը ժամը 19.00-ի սահմաններում Աղվան Դարբինյանը զորամասի հրամանատարի կողմից խնդիր ստանալով կանգնեցնել Սոթք-Քարվաճառ ավտոճանապարհով ընթացող, զորավարժություններին մասնակցող, ՀՀ ՊՆ մեկ այլ` N 1 զորամասի «ԳԱԶ 330800» մակնիշի ՊՆ 8508 Շ զինհամարանիշի ավտոմեքենայի առաջխաղացումը, սկզբից ձեռքերով պայմանական նշաններ է արել, սակայն նկատելով, որ ավտոմեքենան կանգ չի առնում և շարունակում է առաջ ընթանալ, հանդիսանալով պետ և պաշտոնատար անձ, իրավունք չունենալով զորավարժության ժամանակ մարտական փամփուշտներով կրակոցներ արձակել` խախտել է զորավարժության սահմանված կարգը, կատարելով իշխանազանցություն` վերադաս հրամանատարության մոտ պարտաճանաչ սպայի տպավորություն թողնելու, խնդիրը ժամանակին կատարելու և գոհունակության արժանանալու անձնական շահագրգռվածությունից ելնելով, ԿՁԳ տեսակի ՍՎ-3513 համարի հրազենով վեց հատ մենահատ կրակոցներ է արձակել օդ: Այնուհետև մեկ անգամ դիտավորությամբ կրակել է տվյալ ավտոմեքենայի ուղղությամբ, որի հետևանքով գնդակը միջանցիկ անցնելով ավտոմեքենայի աջ դռան միջով, դիպել է խցիկում նստած, կապիտան Գագիկ Գվիդոնի Խաչատրյանի աջ կոնք-ազդրային հոդի շրջանին և վեջինս ստացել է հրազենային-գնդակային կույր վիրավորում` մեծ տամբիոնի կոտրվածք ու նրա առողջությանը պատճառվել է կյանքին վտանգ սպառնացող ծանր վնաս` անզգուշությամբ առաջացնելով ծանր հետևանք:
Ամբաստանյալն ընդունել է մեղքը, և Գեղարքունիքի մարզի ընդհանուր իրավասության դատարանը, բավարարելով նրա` արագացված դատաքննություն անցկացնելու վերաբերյալ միջնորդությունը, ամբաստանյալին մեղավոր է ճանաչել առաջադրված մեղադրանքում` հիմնվելով գործում առկա ապացույցների վրա: Դատարանը ամբաստանյալ Աղվան Դարբինյանի նկատմամբ պատիժ նշանակելիս հաշվի է առել կատարած հանցագործության բնույթն ու հասարակական վտանգավորության աստիճանը, ամբաստանյալի անձը` այն, որ զորամասի հրամանատարության կողմից բնութագրվում է դրականորեն, բազմիցս արժանացել է պատվոգրերի, շնորհակալագրերի: Դատարանը Աղվան Դարբինյանի պատասխանատվությունը և պատիժը մեղմացնող հանգամանք է դիտել նախկինում դատված ու արատավորված չլինելը, անկեղծորեն զղջալը կատարած հանցանքի համար, ինչպես նաև խնամքին 14 տարին չլրացած երկու երեխա ունենալու հանգամանքը: Իսկ պատիժը ծանրացնող հանգամանք չի եղել:
Այդուհանդերձ, Գեղարքունիքի մարզի ընդհանուր իրավասության դատարանը` դատավոր Յուրի Իսկոյանի նախագահությամբ, 2011թ. փետրվարի 17-ի դատավճռով Աղվան Տարոնի Դարբինյանին դատապարտել է 2 տարվա ազատազրկման: Մինչդեռ նշյալ հոդվածի 2-րդ մասը նախատեսում է ավելի խիստ պատիժ. «իշխանազանցությունը կամ պաշտոնեական լիազորությունների սահմանն անցնելը, …եթե այդ արարքները կատարվել են շահադիտական, անձնական այլ շահագրգռվածությունից կամ խմբային շահերից ելնելով, և …որոնք անզգուշությամբ ծանր հետևանքներ են առաջացրել` պատժվում են ազատազրկմամբ` երեքից ութ տարի ժամկետով»:
Սևանի կայազորի դատախազությունն այժմ վերաքննիչ բողոք է բերել, որի բովանդակությունը, սակայն, դեռ հայտնի չէ, բայց կարելի է ենթադրել, որ խիստ պատիժ են ուզում:
Էլմիրա Մարտիրոսյան, «Ժամանակ» օրաթերթ
