Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ ավարտվեց Ռաֆայել Սիմոնյանի գործի դատական քննությունը:
Դատարանը 33-ամյա Ռաֆայել Սիմոնյանին մեղավոր ճանաչեց խմբի կազմում զենքի գործադրմամբ կատարած ավազակային հարձակման համար՝ ՀՀ քրեական օրենսգրքի 175 հոդվածի 2-րդ մասի 1-ին, 4-րդ կետերով:
2014 թվականի ապրիլի 8-ի վաղ առավոտյան՝ ժամը 5-ին, Ռաֆայել Սիմոնյանը գործով չպարզված հանցակցի հետ գյուղմթերք գնելու պատրվակով Մալաթիայի գյուղմթերքների տոնավաճառի մոտից նստել է Շիրակի մարզի գյուղերից մեկի բնակիչ Կորյուն Ա.-ին պատկանող «ԳԱԶ- 24» ավտոմեքենան, որի մեջ եղել է նաև վերջինիս համագյուղացի Հարություն Պ.-ն:
Ռաֆայելն ու իր հանցընկերը մեքենան վարել են տվել Ներքին Շենգավիթ՝ իբր շիրակցիների գյուղմթերքները «բիրիկով» գնելու համար:
Բայց Ներքին Շենգավիթում Ռաֆայելն ու ընկերը Կորյունի ու Հովհաննեսի կյանքի և առողջության համար վտանգավոր բռնություն գործադրելու սպառնալիքներ են տվել, Ռաֆայելը սպառնացել է գարեջրի ջարդված շշով, ընկերը՝ դանակով, Կորյունից «բիրիկով» հափշտակել են մոտը եղած գումարը՝ 155 հազար դրամը, և դիմել են փախուստի:
Ռաֆայել Սիմոնյանը դատապարտվեց 7 տարի ազատազրկման: Նրա հանցընկերոջ մասն առանձնացված է, կատարվում է քննություն:
