Վրացական Apsny.ge կայքի փոխանցմամբ, Վրաստանի փոխարտգործնախարար Նինո Քալանդաձեն մեկնաբանել է Հաագայի դատարանի կայացրած այսօրվա որոշումը.
«Մենք գոհ ենք Հաագայի դատարանի որոշումից, քանի որ նա բավարարել է մեր գլխավոր պահանջը և Ռուսաստանին ճանաչել է որպես հակամարտող կողմ:
Ինչ վերաբերում է «Վրաստանն ընդդեմ Ռուսաստանի» հայցի քննման հրաժարմանը, ապա այդպիսի որոշում է կայացվել` հաշվի առնելով ձևական չափանիշները, ինչը նշանակում է, որ հայցվորը կարող է դիմել Հաագայի դատարան միայն բոլոր ռեսուրսների սպառվելուց հետո:
Հաագայի դատարանը գտել է, որ Աբխազիայում և Հարավային Օսեթիայում իրականացված էթնոզտումների թեմայի շուրջ ռուս-վրացական երկխոսության պաշարը դեռևս սպառված չէ: Սակայն մենք համամիտ չենք դատարանի որոշման այս հատվածի հետ:
Մենք պատրաստ ենք երկխոսություն սկսել Ռուսաստանի հետ և քննարկել այն բոլոր խնդիրները, որոնք առնչվում են Ռուսաստանի կողմից վրացական օկուպացված տարածքներում իրականացված էթնոզտումներին: Եթե դա էլ արդյունքի չհանգեցնի, ապա Հաագայի դատարանի դռները բաց կլինեն Վրաստանի առջև` Ռուսաստանի դեմ համապատասխան հայց ներկայացնելու համար»:
Հիշեցնենք, որ այսօր Հաագայի դատարանը հրաժարվել է քննել «Վրաստանն ընդդեմ Ռուսաստանի» հայցը`դա պատճառաբանելով նրանով, որ այդ խնդիրը չի տեղավորվում իր լիազորությունների շրջանակներում: