Նախորդ շաբաթ Ռուսաստանի Դաշնության նախագահ Վլադիմիր Պուտինի և Աբխազիայի ինքնահռչակ հանրապետության նախագահ Ռաուլ Խաջիմբայի կողմից Սոչիում ստորագրված դաշնության և ռազմավարական համագործակցության պայմանագիրը, որը կգործի 10 տարի և հետագայում կարող է հինգ տարին մեկ երկարաձգվել, ենթադրում է նաև Աբխազիայի անդամակցությունը Եվրասիական ինտեգրացիոն պրոյեկտներին: Թեև պրոյեկտները գտնվում են բավականին ծանր վիճակում, ՄՄ անդամ երկրներն այս փուլում նույնիսկ հրաժարվում են միմյանց հետ բանակցել այն հարցերի շուրջ, որոնք առաջացել են ուկրաինական ճգնաժամի հետևանքով և ենթադրաբար, չէին ցանկանա Աբխազիայի տեսքով մեկ այլ գլխացավանք ունենալ, Աբխազիայի հայ համայնքի ներկայացուցիչները կողմ են ԵՏՄ անդամակցությանը, ավելին՝ դա անհրաժեշտություն են համարում Աբխազիայի համար:
«Առաջին լրատվական»-ի հետ զրույցում Աբխազիայի հայ համայնքի ականավոր գործիչ, Աբխազիայի հերոս Գալուստ Տրապիզոնյանն ասաց, որ Ռուսաստանի նախաձեռնած եվրասիական ինտեգրացիոն պրոյեկտները մեծ ներուժ ունեցող միություններ են, և Աբխազիայի հայերը շատ կցանկանային, որպեսզի Աբխազիան միանար այդ պրոյեկտներին, քանի որ այդ հարցն Աբխազիայում շրջանառվում է։ Սակայն, ըստ նրա, դա կապված է մի շարք լուրջ խնդիրների ու հարցերի հետ:
«Իհարկե, Աբխազիան ձգտում է, այլ հարց է, թե ինչպես դա կստացվի, կհաջողվի իրականացնել, թե՞ ոչ: Դա մեր ցանկությունն է, բայց կան հարցեր, որոնք առաջանալու են: Աբխազիայի հայերը այդ երկրի քաղաքացիներ են և կիսում են Աբխազիայում իրականացվող բոլոր լավ նախաձեռնությունները, դրանից ոչ մեկի համար վատ չի լինի:
Առաջին հերթին՝ մենք կունենանք տնտեսական օգուտներ, երկրորդ հերթին՝ քաղաքական, որովհետև Աբխազիային մասնակիորեն կսկսեն ճանաչել այն երկրները, որոնք մտնում են ԵՏՄ կազմի մեջ»,- ասաց Գալուստ Տրապիզոնյանը: Վերջինիս քիչ է մտահոգում, թե դրանից կտուժեն հայ-վրացական հարաբերությունները: Գալուստ Տրապիզոնյանը հարգում է Ռուսաստանի և աշխարհաքաղաքական մյուս կենտրոնների աշխարհաքաղաքական շահերը: Ըստ նրա, որ ՌԴ-ն շարունակում է աշխարհաքաղաքական ճգնաժամի պայմաններում գործել վճռական՝ դադարեցնելով «Հարավային հոսք»-ն ու այլ պրոյեկտներ Արևմուտքի հետ, ինչը խոսում է այն մասին, որ ՌԴ-ն պատրաստ է այդ քայլերին, քայլերի, որոնցից Եվրոպան «լացում» է:
«Ես կարծում եմ, որ ՌԴ-ն մեծ ընտրության հնարավորություն չունի, ուստի վարվելու է այնպես, ինչպես իրեն է շահավետ, իսկ մեզ հետ հաշվի չեն նստելու: Մենք՝ Աբխազիայում ապրող հայերս, ունենք ռուսական քաղաքացիություն, իսկ այն պայմանագիրը, որը կնքվել է, հայերին մեծ հնարավորություններ է տալիս, ուստի մեր հույսն այն է, որ սահմանների հարցում ազատ գոտի կլինի, ազատ տեղաշարժ՝ ապրանքների համար, Հայաստանի հետ հաղորդակցություն, իսկ Վրաստանը խոչընդոտում է»,- ասաց Տրապիզոնյանը:
Հիշեցնենք, որ ավելի վաղ Աբխազիայի հայ համայնքի պատգամավորներն ու ղեկավարները դիմել էին երկրի ղեկավարներին՝ Աբխազական երկաթուղու վերաշահագործման հարցի շուրջ քննարկումներ սկսելու առաջարկով: Աբխազիայի ղեկավարն արդեն իր դրական ցանկությունը հայտնել է այս հարցում, սկայն վրացական կողմը չի դիտարկում այս հարցը՝ պնդելով, թե Վրաստանը որևէ կողմի հետ նման հարց չի քննարկում:
