2015թ. համար Շվեյցարիայի նոր նախագահի և փոխնախագահի ընտրությունը կանցկացվի այսօր՝ երկրի Դաշնային խորհրդի (խորհրդարանի) 2 պալատների համատեղ նիստի ընթացքում: Այս մասին հայտնում է TASS-ը: Նրանց անունները հայտնի են նախօրոք, իսկ քվեարկության ելքը ոչ ոքի մոտ կասկած չի հարուցում. այդպիսին է շվեյցարական քաղաքական համակարգի յուրահատկությունը՝ հիմնված հիմնական քաղաքական ուժերի համաձայնության վրա:
Երկրի նախագահը կդառնա արդարադատության և ոստիկանության դաշնային դեպարտամենտի ղեկավար Սիմոնետա Սոմարուգան՝ Շվեյցարիայի Սոցիալ-դեմոկրատական կուսակցությունից: 2014թ. նա զբաղեցրել է փոխնախագահի պաշտոնը:
Փոխնախագահ կդառնա էկոնոմիկայի, կրթության և հետազոտությունների դաշնային դեպարտամենտի ներկայիս ղեկավար, Շվեյցարիայի Արմատական-դեմոկրատական կուսակցության անդամ Յոհան Շնայդեր-Ամանը: Եվ նա, և Սիմոնետա Սոմարուգան իրենց նոր պարտականությունների հետ մեկտեղ կշարունակեն ղեկավարել իրենց գերատեսչությունները:
Շվեյցարիայում նախագահին ու փոխնախագահին ընտրում է խորհրդարանը՝ կառավարության անդամներից, ռոտացիոն սկզբունքով: Նրանց աշխատանքի ժամկետը 1 տարի է՝ առանց հաջորդ ժամկետով վերընտրվելու իրավունքի: Խորհրդարանն ունի 246 պատգամավոր, և բավական բարձր է համարվում 180 կամ ավելի ձայն ստանալը:
