«ԱրմենՏել» ընկերության ներքին կառուցվածքային փոփոխությունները, ֆիքսված և բջջային հեռախոսակապի ծառայությունների տարանջատման հետ կապված, մոտենում են ավարտին: Ինչպես «Առաջին լրատվական»-ին հայտնեց ընկերության հասարակայնության հետ կապերի ծառայության ղեկավար Անուշ Բեղլոյանը, հունվարի 14-ից բջջային ծառայությունը կղեկավարի Սերգեյ Զակուրաևը, իսկ ֆիքսված լարային հեռախոսակապի ծառայության ղեկավարը կնշանակվի քիչ ավելի ուշ: Նա շեշտեց, որ այս «տրոհումը» չի նշանակում ընկերության մի մասի վաճառք, պարզապես անցում է կատարվում կառավարման եվրոպական մոդելի, որը գործել է նաև հունական «ՕՏԵ»-ի ղեկավարման տարիներին՝ մինչև 2006 թ.: Այդ նպատակով արդեն բացվել են բջջային կապի սպասարկման գրասենյակներ: Ներկայում ընկերության գլխավոր տնօրենի պաշտոնակատարն է Կարեն Շահնազարյանը, ով 2009-ի ապրիլին կրկին ժամանակավորապես կառավարել էր ընկերությունը: Առաջիկայում բաժնետերերը նաև «ԱրմենՏելի» գլխավոր տնօրեն կնշանակեն:
«Նորմալ պրոցես է, 2 ստորաբաժանումները կունենան առանձին ղեկավարներ, իսկ ընդհանուր ընկերությունը կղեկավարի գլխավոր տնօրենը: Այս փոփոխությունն ուղղված է բիզնեսի ճկունության, արդյունավետության բարձրացմանը»,- ասաց Ա. Բեղլոյանը՝ նշելով, որ ընկերությունը զարգանում և աճում է, ավելանում է բաժանորդների թիվը: Ներկայում «ԱրմենՏելն» ունի մոտ 150 հզ. լայնաշերտ ինտերնետի բաժանորդ, 0.5 մլն՝ ֆիքսված կապի և 700 հզ. բջջային կապի բաժանորդներ:
Հիշեցնենք, որ «ԱրմենՏել» ՓԲԸ-ի սեփականատեր «Վիմպելկոմի» բաժնետոմսերի 42.95 %-ը պատկանում է «Տելենորին», իսկ «Վիմպելկոմի» նախկին կառավարիչ ռուսական «Ալֆա գրուպին» պատկանում են ընդամենը 41.85 % բաժնետոմսերը: «Վիմպելկոմի» գլխավոր գրասենյակն Ամստերդամում է:
