«Քրիստոնեա-ժողովրդական վերածնունդ» կուսակցությունը փետրվարի 18-ի նախագահական ընտրություններում պաշտպանելու է «Ազատություն» կուսակցության նախագահ, ՀՀ նախկին վարչապետ Հրանտ Բագրատյանի թեկնածությունը: Այս մասին այսօր հայտարարություն է տարածել այդ կուսակցությունը: «Քրիստոնեա-ժողովրդական վերածնունդ» կուսակցությունը որոշել է` 2013 թ. ՀՀ նախագահի ընտրություններում պաշտպանել ՀԱԿ անդամ-գործընկեր «Ազատություն» կուսակցության նախագահ Հ.Բագրատյանի թեկնածությունը»,- նշված է հայտարարության մեջ:
Հիշեցնենք, որ «Քրիստոնեա-ժողովրդական վերածնունդ» կուսակցությունը ՀԱԿ անդամ է:
Հիշեցնենք նաև, որ անցած տարեվերջին ՀԱԿ առաջնորդ Լևոն Տեր-Պետրոսյանը հայտարարեց, որ չի առաջադրելու իր թեկնածությունը` դաշտը թողելով իրենից ավելի երիտասարդ գործիչներին: Դրանից կարճ ժամանակ հետո ՀԱԿ-ը հայտարարեց, որ քաղխորհրդի նիստում որոշում է կայացվել, որ Կոնգրեսը նախագահական ընտրություններում թեկնածու չի առաջադրելու և չի սատարելու որևէ այլ թեկնածուի: Այդ հայտարարոթյունից անմիջապես հետո «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը հայտարարեց, որ ինքը այդ ժամանակ Հայաստանում չի եղել և չի մասնակցել այդ նիստին: Եվ որ ինքը համաձայն չէ այդ որոշման հետ: Եվ Լ.Տեր-Պետրոսյանի չառաջադրվելուց հետո արդեն մեկնաբանություններ էին հնչում, որ այդ կուսակցությունը կպաշտպանի Հ.Բագրատյանին:
Ի դեպ ՀԱԿ-ի այդ որոշման հետ համաձայն չէր նաև ՀԱԿ մեկ այլ անդամ` «Ժողովրդավարական հայրենիք» կուսակցության նախագահ Պետրոս Մակեյանը, որն էլ «Առաջին լրատվական»-ի հետ զրույցում ասել է, թե նախագահական ընտրությունների հետ կապված իր դիրքորոշումը կհայտնի հունվարի կեսին:
