ՀԱԿ-ից առաջադրվելու բարոյական իրավունք ուներ միայն Նիկոլ Փաշինյանը: Այսօր «Տեսակետ» ակումբում հրավիրված ասուլիսում նման կարծիք հայտնեց «Ազգային համաձայնություն» կուսակցության առաջնորդ Արամ Հարությունյանը. «Լևոն Տեր-Պետրոսյանից բացի, ՀԱԿ-ից մեկ էլ Նիկոլ Փաշինյանը կարող էր առաջադրվել, որովհետև նա գոնե ինքնուրույն ինչ-որ ծրագրեր անում էր մինչև Տեր-Պետրոսյանի քաղաքականություն վերադառնալը, Իմպիչմենտ և այլն: Իսկ ո՞վ է Հրանտ Բագրատյանը առանց Տեր-Պետրոսյանի, նույնիսկ պատգամավոր դարձավ, երբ Տեր-Պետրոսյանը վայր դրեց իր մանդատը»:
Ինչ վերաբերում է նախագահի մեկ այլ թեկնածու Րաֆֆի Հովհաննիսյանին, ապա ըստ Արամ Հարությունյանի, նա էլ իշխանության դրածոն է. «Բա իհարկե, այդ մարդը իր խմբակցության ցուցակը նույնիսկ նրանց համաձայնությամբ կազմեց, այդքան լավն է Ստեփան Սաֆարյանը, որ հիմա Րաֆֆիին է պաշտպանում, թող այնպես աներ, որ հույսը չմնար պլակատին հաղթելը:
Թող Րաֆֆին իր առաջ խնդիր չդներ Թևան Պողոսյանին պատգամավոր դարձնել և Անահիտ Բախշյանին, Ստեփան Սաֆարյանին ցուցակի առաջին համարներում գրեր: Հետո էլ Խաչատուր Քոքոբելյանին կպավ, թե դիր մանդատդ: Ինչու՞ պետք է նա դներ մանդատը: Րաֆֆին ուղղակի ուզում էր, որ Թևան Պողոսյանը պատգամավոր դառնա Քոքոբելյանի և ոչ թե իր մանդատի հաշվին»:
Նախագահի թեկնածու Արամ Հարությունյանի կարծիքով՝ ինքը կունենա բավականին մեծ ընտրազանգված՝ ոչ միայն քաղաքում, այլ նաև մարզերում և ընտրապայքարի մեջ մնալու դեպքում անպայման կանցնի երկրորդ փուլ:
