«Ազգային համաձայնություն» կուսակցության առաջնորդ, նախագահի թեկնածու Արամ Հարությունյանն այսօր լրագրողների հետ հանդիպման ընթացքում նշեց, որ իր հանդեպ քաղաքական ուժերը սև փիառ են անում, և ինքն էլ ոչ թե հայտնվում է հինգ տարին մեկ, այլ իրեն հեռուստաեթեր են տրամադրում հինգ տարին մեկ. «Իշխանությունը սարսափած է, այն սև փիառը, որ իմ հանդեպ է արվում, արդեն ամեն ինչ ասում է. ի՞նչ է նշանակում չեք եղել, ես միշտ եղել եմ, պարզապես նրանք են հեռուստաեթերն արգելափակել»:
Արամ Հարությունյանի կարծիքով՝ մենք հինգ տարի շարունակ Հայաստանում միայն կորուստներ ենք ունեցել, և իշխանությունն ամեն ինչ արել է, որ «արտաքին քաղաքականություն» հասկացությունն իսպառ վերանա մեզ մոտ. «Ի՞նչ ենք ստացել արտաքին քաղաքականության հետևանքով՝ սառեցրած արձանագրություններ, սառեցրած հարաբերություններ Հունգարիայի հետ: Ամբողջ խնդիրն այն է, որ մենք, ըստ էության, չունենք արտգործնախարարություն»:
Թեկնածուն նաև նշեց, որ մինչև հիմա ուժի մեջ է իր այն առաջարկը, որ ընտրություններից առաջ պետք է ինքնաբացարկ հայտնեն և Սերժ Սարգսյանին միայնակ թողնեն քվեաթերթիկի հետ: Ըստ թեկնածուի՝ գործող նախագահն այդ դեպքում չի կարողանա ապահովել մարդկանց հիսունմեկ տոկոս մասնակցությունը:
