Ուրբաթ «Ա» գծի գնացքները, որոնք դեռևս 1913թ. դեկտեմբերին էին դուրս եկել երթևեկության և Բուենոս Այրեսը դարձրել հարավային կիսագնդի մետրոպոլիտեն ունեցող առաջին քաղաքը, վերջին անգամ են դուրս եկել երթևեկության:
100-ամյա գոյության ընթացքում մետրոպոլիտենի «Ա» գծի գնացքները, որոնք կառուցվել էին բելգիական La Brugeoise et Nicaise et Delcuve ձեռնարկությունում, դարձել են Բուենոս Այրեսի պատմամշակութային խորհրդանիշներից մեկը:
Վագոնները, որոնք տեղի բնակիչներն անվանում են La Brugeoise կամ ուղղակի «բելգիացիներ», ցանկացած այլ քաղաքի գնացքների վագոններից տարբերվում են իրենց դիզայնով. փայտե լայն նստարաններ, զարդարված պատեր, դռներ, որոնք պետք է բացեն իրենք` ուղևորները, անցած դարի դիզայնի առանձնահատկություններ:
Քաղաքային իշխանությունները հաղորդել են, որ երեք ամիս հետո հին վագոնները կվերածվեն հասարակական ընթերցման սրահների: Գրքերի առաջին խմբաքանակը կմատակարարեն քաղաքային իշխանությունները, իսկ այնուհետև այցելուներն իրենք կմեծացնեն գրքային հիմնադրամը: 100-ամյա վագոնների տանիքներում կտեղադրվեն արևային մարտկոցներ, իսկ ներսում` անլար համացանց:
