Բրիտանական դատարանը 100-ժամյա հասարակական աշխատանքի է դատապարտել 2 ցանցահեններին, որոնք կիբերհարձակում էին գործել ձայնագրման Sony Music Entertainment ընկերության վրա ու գողացել Մայքլ Ջեքսոնի չհրապարակված ձայնագրությունները:
Մեղադրող կողմի տվյալներով՝ 27-ամյա Ջեյմս Մարքսն ու 26-ամյա Ջեյմս Մաքկորմիկը համակարգիչների միջոցով կոտրել են Sony-ի ամերիկյան սերվերները ու բեռնել գրեթե 8 հազար ֆայլ, որոնք առնչվում են Ջեքսոնի ստեղծագործությանը:
Գողացված ձայնագրությունների թվում են նաև երգչի ելույթների ձայնագրությունները, ինչպես նաև տեսահոլովակներ ու լուսանկարներ` հայտնում է RIA Novosti-ն:
Գործակալության հաղորդմամբ` Մարքսին ու Մաքկորմիկին բրիտանական իշխանությունները ձերբակալել են 2011թ. մայիսին, երբ Sony-ն հայտարարեց ընկերության սերվերները կոտրելու մասին:
Վերջիններիս նամակագրության միջոցով պարզվել է, որ նրանք ծրագրել են վաճառել գողացված ֆայլերը:
Ջեքսոնը մահացել է 2009թ. հունիսի 25-ին` 51 տարեկանում:
