«Հեռուստատեսությունն այժմ չունի ինֆորմացիա տալու մենաշնորհ, ինչպես ժամանակին ուներ: Այսօր կա մրցակցություն, մի մասը մրցակցային դաշտի որևէ պարտավորություններով, քաղաքական խմբավորումների առաջ պարտավորված չէ,իսկ հեռուստատեսությունը պետք է հավասարության սկզբունքները պահպանի: Եթե հավասարապես ակտիվ են թեկնածուները, պատրաստակամ են գալ և մասնակցել հարցազրույցների, մամուլի ասուլիսների: Եթե իրենցից է գալիս պասիվությունը, արհեստականորեն հավասարությունն ապահովելն անհնար է»,- «Երկիր Մեդիա» հեռուստաընկերության «Երկրի հարցը» հաղորդման եթերում ասել է Երևանի Մամուլի ակումբի նախագահ Բորիս Նավասարդյանը
Նախորդ համապետական ընտրություններում Բորիս Նավասարդյանը թեկնածուների հանդեպ խտրականության դրսևորում չի տեսել եթերում, սակայն պատահել են դեպքեր, երբ նույն ընտրատարածքի թեկնածուների մի մասին հրավիրել են եթեր, մյուսին` ոչ:
ԵՄԱ նախագահը կարևորել է լրագրողի պրոֆեսիոնալիզմը. «Եթե լրագրողը փորձում է խոսեցնել հանրությանը, միշտ կարող է գտնել տարբեր կարծիքնր հայտնողների: Հաճախ ցուցադրում են մի թեկնածուից միայն լավը, մյուսից` բացասական կամ չեզոք կարծիքներ: Դա նշանակում է, որ տվյալ թեկնածուն կարողանում է լրատվամիջոցներին օգտագործել իր քարոզչության համար»: Լրագրողը, ըստ նրա, պետք է լինի պրոֆեսիոնալ և ողջ քարզարշավում իմանա տողատակերը, համատեքստը:
Եթե, որպես թեկնածու, ընտրություններին մասնակցում է պաշտոնյա, պետք է նրանից պահանջել, որ սահմանափակի հանրության մեջ պաշտոնական դիրքերից երևալու հնարավորությունը:
Բորիս Նավասարդյանը համարում է, որ պետք է նախընտրական փուլում չմոռանալ քաղաքագետներին և վերլուծաբաններին, և տարբեր կարծիքներ ունեցող վերլուծաբաններին ժամանակ առ ժամանակ եթեր տրամադրել: Դա ևս կողմնորոշում է ընտրողին: ԵՄԱ նախագահը նշել է, որ ամբողջ եթերը մշտադիտարկվելու է` սկսած քաղաքական հաղորդումներից մինչև համերգներ:
Ինչ վերաբերում է ընտրագրավին, 8 միլիոն դրամը Բորիս Նավասարդյանը համարում է խելամիտ գումար, որը հնարավորություն չի տա շատերին արկածախնդրության գնալ, իսկ որոշներն էլ, ովքեր ունեն իրական հնարավորություններ, չնահանջել:
