Լոս Անջելեսում չորեքշաբթի օրն ավելի քան 200 ցուցարար է ձերբակալվել, որոնք բողոքում էին սևամորթ դեռահաս Մայքլ Բրաունին սպանած ոստիկան Դարեն Ուիլսոնին արդարացնելու երդվյալ ատենակալների որոշման դեմ: Այս մասին հայտնում է TASS-ը՝ հղում անելով քաղաքի ոստիկանական դեպարտամենտին:
Տեղի ժամանակով ժամը 19:30-ին (Երևանի ժամանակով՝ 06:30-ին) Լոս Անջելեսի ոստիկանության դեպարտամենտը փողոցներ դուրս եկած ցուցարարներին հրամայել է 4 րոպեի ընթացքում ցրվել: Նրանց, ովքեր մնացել են տեղում, իրավապահները տարել են ոստիկանության բաժանմունքներ: Ոստիկանության հրահանգներին չենթարկվելու համար ձերբակալվածները կարող են ազատ արձակվել 500 դոլար գրավի դիմաց: Նրանք, ում համար գրավ չեն վճարի, բանտում կմնան առնվազն մինչև դեկտեմբերի 1-ը՝ նշել են ոստիկանությունում:
Չնայած ձերբակալություններին՝ Լոս Անջելեսում բողոքի ակցիաներն արդեն երրորդ օրն է՝ քաղաքի տարբեր մասերում շարունակվում են: Փողոցներ են դուրս եկել մի քանի հարյուր մարդ: Ցուցարարները պահանջում են դատել Ուիլսոնին և ԱՄՆ-ում անզեն մարդկանց սպանած մյուս սպաներին:
Ակտիվիստները բացականչում են՝ «Չի լինի դատ՝ չի լինի և խաղաղություն», «Ազատեք ցուցարարներին, բանտարկեք մարդասպաններին», «Պահանջում ենք արդարադատություն մարդասպան ոստիկանների նկատմամբ»:
