ՌԴ-ն ուղղաթիռի միջադեպը չի դիտարկվում որպես աննախադեպ ագրեսիա Հայաստանի դեմ, որպեսզի գործի դնի իր ողջ գործիքակազմը` երեկ ասաց ռուսաստանցի քաղաքական վերլուծաբան, միջազգային անվտանգության խնդիրներով մասնագիտացած կԼՀ կենտրոնի փոխնախագահ, քաղաքական գիտությունների դոկտոր Դմիտրի Պոլիկանովը:
«Առաջին լրատվական»-ի դիտարկմանը, թե հայկական պետությունների նկատմամբ աննախադեպ ագրեսիայի՝ ռազմական ուղղաթիռի խոցումից հետո ՌԴ դիրքորոշումը չառանձնացավ ԵԱՀԿ ՄԽ և ՄԽ համանախագահ երկրների դիրքորոշումից` այն դեպքում, երբ ՀՀ-ն ՌԴ-ի ռազմավարական գործընկերն է և ընդունված է ՌԴ-ին համարել ՀՀ անվտանգության երաշխավոր, Պոլիկանովն արձագանքեց` եթե ուշադրություն ենք դարձրել, ապա Ռուսաստանի տրամադրած անվտանգության երաշխիքներն իր բոլոր գործընկերներին կրում են քաղաքական-դիվանագիտական բնույթ: Նրա խոսքով` Ռուսաստանը դատապարտում է, կոչ է անում, բարձրացնում է հարցը և նման բաներ: Սակայն դրա հետ մեկտեղ, վերլուծաբանի վստահեցմամբ, վերջին 10-15 տարիների ընթացքում Ռուսաստանը զերծ է մնում ռազմական ուժի կիրառումից, մասնավորապես արտերկրում իր զորքերը գործի դնելուց:
«Սա պայմանավորված է նաև հասարակական կարծիքի տարբեր մոտեցումների և էլիտաների ընդհանուր փիլիսոփայության հետ: Ուստի ես չեմ կարծում, որ ուղղաթիռի միջադեպը դիտարկվում է որպես աննախադեպ ագրեսիվ գործողություն, և դա պատճառ չէ ողջ գործիքակազմը գործի դնելու համար»,- ասաց Պոլիկանովը:
Գնահատելով Մինսկի խմբի գործունեությունը՝ Դ. Պոլիկանովն ասաց, որ ԵԱՀԿ Մինսկի խմբի գործունեությունում ակնհայտորեն կա տարբերություն խոսքի և գործի միջև: Ըստ նրա՝ Հայաստանի և Ադրբեջանի առողջ քաղաքական գործիչները պատերազմ չեն ցանկանում, քանի որ հասկանում են, որ չնայած ռազմատենչ հռետորաբանությանը, իրենց պետությունները դրան պատրաստ չեն: «Բայց իրենց դիրքերը զիջել ևս նրանք չեն կարող՝ կոմպրոմիսի դաշտը չափազանց նեղ է, հաշտության տրամաբանությունը հասարակության շրջանում ներդնելու ուղղությամբ որևէ մեկը չի աշխատում, ուժեղ, հեղինակավոր առաջնորդներ, որոնք պատրաստ են իրենց վրա պատասխատվություն վերցնել և գնալ հասարակական տրամադրություններին հակառակ, ևս չկան: Վերջնահաշվով բոլոր կողմերը ջանում են ամրացնել իրենց դիրքերը իրենց բարձր և ահաբեկիչ հռետորաբանության հաշվին: Մոռանալով, որ բառային լարվածությունը ինչ-որ պահի կարող է վերածվել փաստացի դիմակայության` կողմերին մղելով դեպի տաք պատերազմ: Այնպես որ, նման միջադեպերը մոտ ապագայում անխուսափելի են, ցավոք սրտի»,- ասաց Դ. Պոլիկանովը: