ՄԱԿ-ում Իրանի մշտական ներկայացուցիչն ուրբաթ օրն իր հայտարարության մեջ հերքել է իրանական ցանցահենների մասնակցությամբ ԱՄՆ բանկերի վրա կիբեռհարձակումներ իրականացնելու ամերիկյան ԶԼՄ-ների տարածած տեղեկատվությունը: Նա նաև նշել է, որ Իրանը դատապարտում է նման գործողությունների կիրառումը ցանկացած երկրի նկատմամբ:
Ամերիկյան The New York Times թերթում ավելի վաղ տեղեկություն էր հայտնվել ԱՄՆ բանկերի նկատմամբ կիբեռհարձակումների մասին, որոնք ենթադրաբար կատարվել էին Իրանի կողմից:
ԱՄՆ Պետքարտուղարության և առևտրի նախարարության նախկին աշխատակից Ջեյմս Լուիսը The New York Times-ին տված հարցազրույցում ասել է, թե ԱՄՆ-ը ոչ մի կասկած չունի, որ դա Իրանի կողմից է իրականացվել:
Ցանցահենների անձնական տվյալները պաշտոնապես չեն հայտարարվում, սակայն հայտնի է, որ նրանք օգտագործում են նորագույն կիբեռզինատեսակներ, որոնք խաթարում են բանկերի կայքերի աշխատանքը` տեղեկատվություն ստանալու պահին համակարգի օգտատիրոջը ներկայացնելով բազմաթիվ հարցեր:
Անվտանգության ոլորտի ամերիկացի մասնագետների և պաշտոնատար անձանց կարծիքով՝ նման հարձակումներ կարող էին իրականացնել միայն բարձր որակավորում ունեցող մասնագետները: Եվ հենց այդ փաստն է ամերիկացիներին ստիպել մտածել, որ հանցագործությունների հետևում Իրանն է կանգնած, և սա ԱՄՆ–ի կողմից Իրանի նկատմամբ տնտեսական պատժամիջոցներ կիրառելու պատասխանն է:
Չորեքշաբթի օրը ԱՄՆ 20 բանկեր ենթարկվել են կիբեռհարձակումների: Սա արդեն 3-րդ մեծամասշտաբ նման հարձակումն է, որի պատասխանատվությունը ստանձնել է «Իզզ ադ-Դին ալ-Քասսամ» անվամբ խումբը: Առաջին նման հարձակումը կատարվել էր անցյալ տարվա սեպտեմբերին:
