Կոտայքն ավանդաբար համարվել է ԲՀԿ նախագահ Գագիկ Ծառուկյանի ազդեցության տակ գտնվող մարզ, և տեղական կամ համայնքային ընտրությունների ժամանակ այդ կուսակցությունը մարզում հաղթել է: Վերջին խորհրդարանական ընտրություններին ԲՀԿ-ն Կոտայքում ստացել էր մոտ 69 հազար ձայն և հաղթել էր իշխող Հանրապետականին, որը ստացել էր մոտ 50 հազար ձայն: Ընդ որում՝ մարզի 69 համայնքներից 35-ի համայնքապետերը ԲՀԿ անդամ են, որից 3-ը քաղաքապետ են: Փետրվարի 19-ի նախագահական ընտրություններին ո՞ւմ են ընտրելու Կոտայքում ԲՀԿ ընտրողները: Չէ՞ որ Գ. Ծառուկյանն անցած տարեվերջին հայտարարեց, որ չի առաջադրվի նախագահական ընտրություններին, և ԲՀԿ-ն որևէ թեկնածուի չի սատարելու: Հնարավո՞ր է, որ Կոտայքում ԲՀԿ կառույցներն աջակցեն գործող նախագահ Սերժ Սարգսյանին կամ միգուցե սատարեն ընդդիմադիր որևէ թեկնածուի: Այս հարցերի հետ կապված «Առաջին լրատվական»-ը զրուցեց Կոտայքի ՀՀԿ-ական մարզպետ Կովալենկո Շահգալդյանի հետ: Մարզպետի տեղեկացմամբ Կոտայքն ունի 67 համայնք, 7-ը՝ քաղաքային, 60-ը՝ գյուղական: Ունի 286 հազար բնակչություն, որից 45 տոկոսն ապրում է գյուղական համայնքներում, 55 տոկոսը՝ քաղաքներում: Ընտրական ցուցակներով ունի մոտ 232 հազար 800 ընտրող:
– Պարոն Շահգալդյան, ԲՀԿ-ն հայտարարեց, որ թեկնածու չի առաջադրելու և չի սատարելու որևէ թեկնածուի: Այդ դեպքում Ձեր ղեկավարած մարզում ո՞ւմ են ընտրելու ԲՀԿ-ի հազարավոր ընտրողները, և ո՞ւմ օգտին են աշխատելու ԲՀԿ մարզային կառույցները:
– Որևէ կուսակցություն երբ իր ընտրողներին հայտարարում է, թե նախապատվությունը տվեք այսինչ թեկնածուին, այդ կուսակցության բոլոր անդամները գնում ու այդ թեկնածուի՞ն են ընտրում:
– Այնուամենայնիվ դա ազդեցություն ունենում է, հակառակ դեպքում նման կոչ չէր արվի:
– Կատեգորիկ՝ ոչ: Հատկապես նախագահական ընտրություններում, համոզված եմ, որ այդ տարբերակը, այդ հորդորը չի գործում: ԱԺ ընտրությունների ժամանակ էլ մեծապես հնարավոր չի լինում ընտրազանգվածին ուղղորդել: Իսկ նախագահական ընտրությունների ժամանակ՝ առավել ևս: Այնպես որ, յուրաքանչյուրն իր կարծիքը արտահայտելու մեծ հնարավորություն ունի: Եվ այդ ուղղորդումը նախագահական ընտրություններում որևէ դերակատարում չի կարող ունենալ:
– Այդ դեպքում ինչո՞ւ է Հանրապետականը ընտրողներին կոչ անում ընտրել իրենց կուսակցությանը կամ նախագահ Սերժ Սարգսյանին:
– Մեզ լսում են, որովհետև շատ գրագետ ընտրարշավ ենք կազմակերպում, մեր ընտրողներին հասցնում ենք նախագահի նախընտրական ծրագիրը, բացատրում ենք, կարծիքների փոխանակում է առաջանում, հանդիպումներ և այլն: Ընտրարշավի բազմաթիվ այլ ձևեր կան, ու այդ ձևերը ճիշտ օգտագործելու պարագայում մեր թեկնածուի համար կարողանում ենք համապատասխան ձայներ ապահովել: Եվ վերջապես ամեն ինչ համեմատության մեջ է: Ընտրողը համեմատություն է անելու այդ յոթ-ութ թեկնածուների մեջ ու որոշելու է, թե ում և ինչի համար պետք է ձայն տա: Կարծում եմ, որ այստեղ երկրորդ կարծիք լինել չի կարող, որ Ս. Սարգսյանը՝ որպես թեկնածու մյուս բոլոր թեկնածուների նկատմամբ ունի մեծ առավելություն: Իմ կարծիքով՝ Ս. Սարգսյանից բացի ընտրվելու հնարավորություն ունեցող այլ թեկնածու չկա:
– Բայց չէ՞ որ նրա նախագահության տարիներին աղքատության ու արտագաղթի ծավալները մեծացել են:
– Ձեր ասածը կարելի է հարաբերական համարել՝ նայած թե ինչը և որ ժամանակի հետ եք համեմատում:
– Իր նախագահությունից առաջ ընկած ժամանակի հետ:
– Իմ ձեռքի տակ այդ տեղեկատվությունը չկա: Բայց, իհարկե, Հայաստանից արտագնա աշխատանքի գնացողներ կան: Եթե մենք չենք կարողանում մարդկանց համապատասխան եկամուտով աշխատանք տալ, բնականաբար պիտի գնան: Բավականին մեծ թվաքանակով մարդիկ են մասնակցել ընտրություններին: Մեր մարզում ընտրողների թիվը անցած 5 տարիներին գրեթե 25 հազարով ավելացել է:
– Ինչի՞ հաշվին:
– Բնական աճի: Բնական աճ որ ասում ենք, դա նշանակում է մեռնողների և ծնվողների թվաքանակի հարաբերություն:
– Բայց չէ՞ որ ծնելիությունն էլ գնալով անկում է ապրում:
– Բայց հաշվեկշիռը դրական է: Անձնագրայինի պետն էլ հեռուստատեսությամբ հայտարարեց, որ ցուցակները ճշգրտվում են, և մտահոգող հարցերով կարող եք դիմել իրեն:
– Դուք ասում եք, որ եկամուտով աշխատանք չեք կարողանում ապահովել, դրա համար էլ մարդիկ արտագաղթում են: Մյուս կողմից էլ ասում եք, որ Ս. Սարգսյանից բացի առավելություններ ունեցող ուրիշ թեկնածու չկա: Եթե Ս. Սարգսյանի իշխանության օրոք չեք կարող աշխատանքով ապահովել, և մարդիկ արտագաղթում են, ինչո՞ւ պետք է նրան նորից ընտրեն:
– Դրա համար էլ ասում եմ, որ այդ ամենը հարաբերության մեջ է: Հարաբերականության տեսություն գոյություն ունի: Պիտի վերընտրվի, որովհետև մարդիկ համեմատում են անկախության տարիները, ձեռք բերվածը, արվածն ու չարվածը: Եվ իմանալով Ս. Սարգսյանի ունակությունները՝ բնականաբար իրեն պետք է ձայն տան: Հակառակ դեպքում ո՞ւմ պետք է տան: Մարդկա՞նց, որոնք ժողովրդին հայտնի չէին, չճանաչված մարդկանց ձայն կտա՞ն:
– Նախկին վարչապետ Հրանտ Բագրատյանը, «Ժառանգությունե կուսակցության նախագահ Րաֆֆի Հովհաննիսյանը բավականին հայտնի գործիչներ և ընդդիմադիր թեկնածուներ են: ՀՀԿ-ի իշխանությունից դժգոհող ընտրազանգվածը կարող է նրանց ընտրել:
– Հ. Բագրատյանը ճանաչված է տնտեսությունը խորտակելով:
– Հ. Բագրատյանը Հայաստանի տնտեսությունը ազատականացնող վարչապետն է եղել: Նրա վարչապետության տարիներին տնտեսությունը սկսեց վերականգնման փուլ մտնել: Եվ նրա վարչապետության տարիներին մեր երկրի բոլոր խոշոր օբյեկտները պետական էին: Դրանք սեփականաշնորհվեցին և մեջ-մեջ արվեցին նախորդ իշխանությունների օրոք:
– Դա ձեր կարծիքն է, ես էլ այլ կարծիք ունեմ:
– Ամեն դեպքում Կոտայքի մարզում ԲՀԿ-ն ուժեղ է, և չի բացառվում, որ նախագահական ընտրություններին Դուք խնդիրներ ունենաք: Չէ՞ որ խորհրդարանական ընտրություններին էլ ձեր մոտ ՀՀԿ-ն պարտվեց ԲՀԿ-ին:
– Ես համոզված եմ, որ մեր մարզում մեր թեկնածուն մեծաթիվ ձայներ կունենա, որովհետև մենք պատրաստվում ենք շատ գրագետ ընտրարշավ անցկացնել: Փետրվարի 19-ին արդյունքները կիմանաք և ձեր հարցի համար կզղջաք:
– Իսկ հնարավո՞ր է, որ ԲՀԿ-ական համայնքապետերն աշխատեն Ս. Սարգսյանի համար: Դուք համայնքապետերին կարգադրեք աշխատել ձեր թեկնածուի օգտին:
– Համայնքապետերի հետ մենք ընտրության թեմաներ չենք քննարկում, աշխատանքային թեմաներ ենք քննարկում: Իսկ երբ սկսվի ընտրարշավը, ու ամեն ինչ ինձ համար պարզ լինի, այդ ժամանակ զանգեք՝ կասեմ, թե որ համայնքի ղեկավարն է Ս. Սարգսյանի օգտին քարոզարշավ անցկացնում, որը՝ ոչ: Դեռ քարոզարշավը չի սկսվել, հիմա իզուր եք այդ հարցերն ինձ ուղղում:
– Քարոզարշավի ժամանակ հանդիպելո՞ւ եք ԲՀԿ-ական համայնքապետերի ու քաղաքապետերի հետ ու հորդորեք աշխատել Ս. Սարգսյանի օգտին:
– Մենք մեր մարզում փորձելու ենք հանդիպել բոլոր ընտրողների հետ: Ընտրարշավը սկսվում է հունվարի 21-ին, դրանից 10 օր հետո պատկերն արդեն ամբողջովին պարզ կլինի, ես արդեն որոշակի կարծիք կունենամ և ձեր հարցերին կպատասխանեմ:
