Թուրքական Cihan լրատվական գործակալության փոխանցմամբ, արտգործնախարար Ահմեդ Դավութօղլուն անդրադարձ է կատարել հայ-թուրքական հարաբերությունների և Լեռնային Ղարաբաղի հակամարտության կարգավորմանը.
«Հայ-թուրքական երկխոսությունը սկիզբ առավ 2005 թվականին, ինչը համահունչ էր մեր որդեգրած «զրո խնդիրներ հարևանների հետ» քաղաքականությանը: Հայաստանի հետ երկխոսության մեջ մտնելը մեր կողմից հետապնդում էր երեք նպատակ. սահմանի բացում, դիվանագիտական հարաբերությունների հաստատում և Թուրքիա-Հայաստան ուղղակի ու անուղղակի կապերի հաստատում:
Սակայն Թուրքիան Հայաստանի հետ հարաբերությունները բարելավելու համար չի կարող կորցնել Ադրբեջանին: Մենք Հայաստանի նախագահ Սերժ Սարգսյանին ու իմ հայ գործընկեր Էդուարդ Նալբանդյանին հայտնել ենք 1-2 շրջան Ադրբեջանին վերադարձնելու մեր ցանկության մասին:
Ադրբեջանին գոհացնելու համար Հայաստանը կարող է նրան զիջել Ֆիզուլու և Աղդամի շրջանները: Այդպիսի իրավիճակում Ադրբեջանն էլ պատրաստ կլինի սահմանի բացմանը: Սակայն Հայաստանը դա մերժեց»:
Հիշեցնենք, որ օրեր առաջ Թուրքիայի Չանքըրը Քարաթեքին համալսարանի միջազգային հարաբերությունների ամբիոնի վարիչ Սեզաի Օզջելիքը հայտարարել էր, որ Թուրքիան ֆուտբոլային դիվանագիտությամբ Հայաստանի հետ երկխոսության մեջ մտավ, որպեսզի ղարաբաղյան հակամարտության կարգավորման գործընթացում վերածվի առանցքային դերակատարի:
