Գարսիա Մարկեսի անվան գրականության մրցանակի դափնեկիր է դարձել արգենտինացի գրող Գիերմո Մարտինեսը: Մրցանակը հանձնվել է Կոլումբիայի մայրաքաղաքում՝ «Կոլոն» թատրոնում: Այս մասին հայտնում է TASS-ը՝ հղում անելով մրցանակաբաշխության պաշտոնական կայքին:
Մրցանակի հանձնմանը ներկա է եղել Կոլումբիայի նախագահ Խուան Մանուել Սանտոսը, որն ընդգծել է այդ միջոցառման անցկացման կարևորությունը՝ այն անվանելով «ականավոր գրողի արժանի մեծարում»:
Գիերմո Մարտինեսն այդ մրցանակին արժանացել է «Զզվելի երջանկություն» պատմվածքների ժողովածուի համար:
«Մենք պատրաստվում ենք գնել ֆինալիստների աշխատանքները, որպեսզի դրանք հայտնվեն երկրի գրադարաններում»,- հայտարարել է Խուան Մանուել Սանտոսը:
Հաղթանակի համար պայքարել է իսպանախոս երկրներում 2013թ. հրապարակված ավելի քան 123 աշխատանք: Բացի Մարտինեսից՝ եզրափակիչ են հասել Կարոլինա Բրուկն Արգենտինայից, Էկտոր Մանխարեսը Մեքսիկայից, Օսկար Սիպանն Իսպանիայից և Ալեխանդրո Սամբրան Չիլիից:
