Իրանի Արվեստի բյուրոն ծրագրում է կինոնկար թողարկել ընդդեմ Բեն Աֆլեքի «Արգո» ֆիլմի: Warner Bros. ստուդիայի ստեղծած դրաման պատմում է ԿՀՎ-Կանադա համատեղ գաղտնի օպերացիայի մասին (1980 թ.)՝ Թեհրանում պատանդ ամերիկացի 6 դիվանագետների դուրս բերման նպատակով: Այս մասին հայտնում է Mehr գործակալությունը: Հիշեցնենք, որ ֆիլմի համաշխարհային պրեմիերան տեղի է ունեցել 2012-ի հոկտեմբերի 11-ին:
«Ֆիլմը, որը վերնագրված է «Գլխավոր շտաբ», 20 ամերիկացի պատանդների մասին է, որոնց հեղափոխականները տեղափոխել են ԱՄՆ»,- հայտարարել է ֆիլմի ռեժիսոր Աթաոլլահ Սալմանիանը: Նրա խոսքերով՝ ֆիլմի թողարկումը համարժեք պատասխան կլինի «Արգո»-ին:
Սցենարում մեծ տեղ է հատկացված ականատեսների վկայություններին: Ռեժիսորի խոսքերով՝ նկարահանումները կսկսվեն հաջորդ տարի, եթե Արվեստի բյուրոն ապահովի անհրաժեշտ ֆինանսավորումը:
Իրանում «Արգո»-ն պաշտոնապես դիտվում է որպես հակաիրանական ֆիլմ:
