«Այսպես որ գնա ամբողջ Հայաստանի մի կեսը դարձնելու են բաց հանք, մյուս կեսը պոչամբար»,- կարծիք հայտնեց Հրազդանի բողոքի ակցիային մասնակցող «Հանուն կայուն մարդկային զարգացման» ՀԿ նախագահ, բնապահպան Կարինե Դանիելյանը:
Նշենք, որ այսօր հրազդանցիները բողոքի ցույց էին կազմակերպել` պահանջելով չշահագործել քաղաքի կենտրոնից քիչ հեռու գտնվող երկաթի հանքը: Դանիելյանը նշեց, որ հանքի շահագործումը իրենից սեյսմիկ վտանգ է ներկայացնում, բացի դրանից` աղտոտվելու է օդային և ջրային ավազանը.
«Հրազդան քաղաքի օդային ավազանը առանց դա էլ աղտոտված է, փոշու արտանետումներն այնքան շատ են, որ 4-5 անգամ գերազանցում են սահմանային թույլատրելի նորմը: Այս պարագայում քաղաքին ավելացնել բաց հանք բարձունքի վրա նշանակում է, որ ամեն պայթյունի հետ քաղաքը կստանա ոչ թե հասարակ, այլ ծանր մետաղներով հագեցած փոշու ավելցուկ:
Շատ մոտ է նաև Հրազդան գետը, որը գնում է նաև Արարատյան դաշտ, ինչն էլ նշանակում է, որ և՛ ստորգետնյա, և՛ վերգետնյա ջրերի միջոցով Հրազդան գետը աղտոտվելու է: Այստեղ են ձևավորվում նաև խմելու ջրի աղբյուրները»:
Դանիելյանը նաև հիշեցրեց, որ Կառավարության հիմնական նպատակներն են գյուղատնտեսության և տուրիզմի զարգացումը, ինչպես նաև հանքարդյունաբերությունը. «Այդ երրոդը առաջին երկուսի հետ անընդհատ կռվի մեջ է, և բացառվում է դրանց միասնական գոյությունը: Հիմա երևի պետք է սթրեսային տուրիզմ զարգացնենք, որ մարդիկ գան, տեսնեն, թե ինչպես չի կարելի երկիրը զարգացնել»: