«Հայաստանի տնտեսությունը գլորվում է, չգիտեմ` անդունդ բառը տեղին է, թե չէ, բայց գլորվում է»,- այսօր ասուլիսի ժամանակ հայտարարեց ԿԲ նախկին նախագահ Բագրատ Ասատրյանը: Ըստ նրա` Հայաստանի 2011 թ. բյուջեով արձանագրված է սոցիալական ծախսերի շատ ավելի քիչ ավելացում, քան գնաճն է, որը արդեն գերազանցել է 9%-ը: «Եթե խոսենք պարենային ապրանքների մասին, որը շատ ավելի կարևոր է սոցիալական տեսակետից, ապա ունեցել ենք 13 և ավելի տոկոս գնաճ»,- ասաց Բ. Ասատրյանը: Նրա խոսքով, գնաճի մակարդակով եթե ավանդաբար Հայաստանը եղել է ամենացածր գնաճ արձանագրած երկրներից մեկը, ապա այսօր գնաճի բարձր մակարդակով զիջում ենք միայն Ուկրաինային: Բացի այդ, ըստ Բ. Ասատրյանի, Հայաստանը էքսպորտի ցուցանիշով ԱՊՀ երկրներում վերջինն է: «Սա այն քաղաքականության արդյունքն է, որն իրականացվել է այս տարիների ընթացքում, մենք զիջում ենք նույնիսկ Տաջիկստանին, ընդ որում` 20%-ով, շատ ավելի ցածր ենք Ղրղզստանից: Եվ գնաճի մասին խոսելիս պետք է շեշտեմ, որ մեզանում դրամավարկային քաղաքականության առումով շատ սխալ որոշումներ են կայացվում, որոնց համար դուք եք վերջում վճարելու` որպես տարիքով ավելի երիտասարդ: 9.1% գնաճը կարողացել են ապահովել այն պարագայում, որ վերջին մեկ տարվա ընթացքում դրամը արժևորվել է: Այսինքն` գնաճը զսպող միակ գործոնը Հայաստանում միայն արտարժույթի վաճառքն է, մի բան, որը անթույլատրելի է, սա հաջորդ սերունդներից են իշխանությունները կտրում` այսօր յոլա տանելու նպատակով»,- նշեց Բ. Ասատրյանը: