Այսօր առավոտից Երևանում տեղացող հորդառատ անձրևին հաջորդեց ձյունը, որի դադարից հետո նորից սկսեց անձրևել: Նոր Նորքում հորդառատ ձյան ժամանակ նույնիսկ կայծակ եղավ: Այս ամենը մարդկանց անհանգստացրեց: Սակայն «Առաջին լրատվական»-ի հետ զրույցում «Հայպետհիդրոմետի» օդերևութաբանական. կանխատեսումների բաժնի պետ Գագիկ Սուրենյանը նշեց եղանակային այս «անհամաձայնության» պատճառը և ասաց, որ անհանգստանալու կարիք չկա.
«Մենք գտնվում ենք ցիկլոնի ազդեցության գոտում, այդ ցիկլոնի մեջ կան երկու` իրարից խիստ տարբեր օդային հոսանքներ. մեկը խիստ ցուրտ է, իսկ մյուսը՝ խիստ տաք: ՀՀ տարածքը ներկա պահին գտնվում է այդ օդային հոսանքների բախման գոտում, բայց ոչ ցուրտն է ներխուժում, ոչ տաքը: Կամ մի փոքր տաքն է ներխուժում, հետո հակառակ պրոցեսն է տեղի ունենում՝ ցուրտ օդն է մոտենում: Այսինքն` նրանց բախման հետևանքով սկզբում մի պրոցեսն է տեղի ունենում, ասենք` ձյունը, հետո մյուսը՝ անձրևը, և դա նորմալ է:
Ընդհանուր առմամբ հիմնականում երեկոյան ժամերին մենք գտնվելու ենք ցուրտ հոսանքի ազդեցության գոտում, ու ջերմաստիճանը նվազելու է, տեղումները հիմնականում լինելու են ձյան տեսքով` բացառությամբ Արարատյան դաշտավայրի, Սյունիքի հովիտների շատ ցածրադիր հատվածների:
Ինչ վերաբերում է Նոր Նորքում տեղացող ձյանն ու կայծակին, ապա նման մի բան տեղի է ունեցել նաև 2000 թվականին: Դա պայմանավորված է ամպրոպային ամպամածությամբ՝ տարբեր հոսանքների բախումը հանգեցնում է ամպրոպային ամպամածության: Սա ոչ բացառված երևույթ է, ոչ էլ, առավել ևս, եղանակային անոմալիա»: