Շվեյցարիայի նախագահ Միշելին Կալմի-Ռեյը ժամանել է Հայաստան մասնակցելու Երևանում Շվեյցարիայի դեսպանատան բացման արարողությանը: Նշենք, որ Կալմի-Ռեյը հայ-թուրքական հարաբերությունների կարգավորման գործընթացում ամենակտիվ և գործուն մասնակցություն դրսևորած անձանցից մեկն է:
«Սարդարապատ» շարժման նախաձեռնող խմբի անդամ Հայկ Բալանյանի դիտարկմամբ, Կալմի-Ռեյի այցը նաև պայմանավորված է այն հանգամանքով, որ մոտենում է ապրիլի 24-ը և ցանկանում են ինչ-որ քայլեր ձեռնարկել, որպեսզի այդ հարցը «ջրեն գնա».
«Լուրջ քայլեր ես այստեղ չեմ ակնկալում` Սերժ Սարգսյանը շարունակում է խաղալ իր սկսած խաղը»:
Նրա խոսքերով, այս ամենը հերթական թատերական ներկայացումն է, որպեսզի հայ ազգը ևս մեկ անգամ սպասի, թե Ցեղասպանություն բառը այս տարի կհնչի՞, թե՞ ոչ:
Բալանյանի դիտարկմամբ, Սերժ Սարգսյանը դուրս չի եկել հայ-թուրքական գործընթացից և դրա հնարավորությունն էլ չունի, արձանագրություններն էլ առ ոչինչ չեն ճանաչված.
«Հայ-թուրքական այդ խաղը շարունակվելու է, և մնալով ֆուտբոլային դիվանագիտության պրոցեսի մեջ` Հայաստանը ոչինչ չի շահում, շահում են միայն միջնորդ պետությունը և Թուրքիան, որը, այդ հանգամանքն օգտագործելով, կասեցնում է Ցեղասպանության հարցը»: