Վրաստանի արդարադատության նախկին նախարար Զուրաբ Ադեիշվիլիի նկատմամբ հայտարարվելու է միջազգային հետախուզում: Այս մասին հաղորդում է Trend գործակալությունը՝ վկայակոչելով Վրաստանի գլխավոր դատախազությանը:
Մոտ ժամանակներս դատախազությունը համապատասխան միջնորդությամբ դիմելու է Վրաստանի ՆԳՆ-ին:
Թբիլիսիի քաղաքային դատարանը բավարարել է գլխավոր դատախազության միջնորդությունը և դադարեցրել է Ադեիշվիլիին տրված երեք արտասահմանյան անձնագրերի և Վրաստանի քաղաքացիությունը հաստատտող փաստաթղթի գործողությունը:
Ադեիշվիլիի փաստաբան Գոչի Սվանիձեի խոսքերով՝ իրեն հայտնի չէ, թե որտեղ է գտնվում իր պաշտպանյալը և արդյո՞ք նա իրականում քաղաքական ապաստան է խնդրել այլ երկրից:
Չհաստատված տեղեկատվության համաձայն՝ արդարադատության նախկին նախարարը քաղաքական ապաստան է խնդրել Բելգիայից:
Ադեիշվիլին մեղադրվում է ծառայողական լիազորությունները չարաշահելու և բանտարկյալների հանդեպ դաժան վերաբերմունքի համար: Նրա գործով հերթական դատալսումը տեղի է ունենալու հունվարի 28-ին:
