«Շատ բարդ հարց է, ոչ մեկ չի կարող պատասխանել, թե այս տարվա ընթացքում զարգացումները Հայաստանին կտանեն դեպի Եվրամիություն, թե Եվրասիական միություն: Դա ժամանակը ցույց կտա»,- «Առաջին լրատվական»-ի հետ զրույցում նման տեսակետ հայտնեց Հայաստանի պետական տնտեսագիտական համալսարանի միջազգային տնտեսական հարաբերությունների ամբիոնի վարիչ, տնտեսագիտության թեկնածու, պրոֆեսոր Գրիգոր Աղաջանյանը:
Ըստ նրա՝ ՀՀ-ն ուզում է երկու կառույցի հետ էլ հարաբերությունները զարգացնել, բայց դա հնարավոր չէ: Գ. Աղաջանյանի խոսքով՝ Հայաստանը ներկայում Եվրամիության հետ ազատ առևտրի ասոցիացիայի պայմանագրի կնքման հետ կապված գործընթացի մեջ է մտել, բայց մյուս կողմից էլ չի կարող Եվրասիայից հրաժարվել, որովհետև այն Ռուսաստանի հետ է կապված:
Թե որքանո՞վ են այս 2 կառույցը մեկը մյուսի հետ համատեղելի, Գ. Աղաջանյանը նշեց, որ Վարդան Օսկանյանի որպես ԱԳ նախարար պաշտոնավարման ժամանակ վարվող կոմպլեմենտար քաղաքականությունը հիմա արդեն չեն հանդուրժում, և ՀՀ-ն անպայման ընտրության առաջ է կանգնելու: Գ. Աղաջանյանը նշեց, որ քանի որ ՀՀ-ն ՀԱՊԿ-ի անդամ է, նաև Ռուսաստանից չի կարող հրաժարվել՝ ստիպված կլինի գնալ դեպի Եվրասիա. «Ռուսաստանից եթե հրաժարվենք, այստեղ Ղարաբաղի հարցն էլ կա: Եթե ԵՄ գնանք, ՌԴ-ն կհրաժարվի և Ղարաբաղի հարցում ՀՀ-ին միայնակ կթողնի, այլևս չի աջակցի: Խնդիրները շատ են, ու Հայաստանը միշտ էլ բարդ պայմաններում է լինում»:
