Սիրիական ընդդիմադիր Ազգային կոալիցիան (ԱԿ) կիրակի օրը հայտարարել է, որ չի պատրաստվում ընդունել նախագահ Ասադի կողմից առաջարկված հակամարտության կարգավորման նախաձեռնությունը, որը հնչեցվել էր ժողովրդին արված դիմումի ժամանակ, հաղորդում է Reuters գործակալությունը։
ԱԿ-ի ներկայացուցիչ Ուալիդ Բաննին հայտարարել է, որ ՌԴ-ի և ԱՄՆ-ի կողմից, Բրահիմիի մասնակցությամբ, կատարվող բանկցությունները հակամարտության կարգավորման համար չեն ընդունվի, եթե Ասադը չլքի իշխանությունը։
Ասադն այդ ելույթի ժամանակ հայտարարել էր, որ իր կառավարությունը պատրաստ է հակամարտության քաղաքական կարգավորմանը, սակայն նրանք չունեն բանակցություններ անցկացնելու համար գործընկերներ։
Նախագահն ընդդիմադիրներին անվանել է «արևմուտքի խամաճիկներ», նա կոչ է արել դադարեցնել երկրում արյունահեղություններ կատարող գործողությունների արտերկրյա ֆինանսավորումները։ Ըստ Ասադի՝ գրոհայիններից շատերը ազգությամբ սիրիացի չեն։
Նոյեմբերի 11-ին Կատարի Դոհա մայրաքաղաքում մի շարք խմբավորումներ և քաղաքական ուժեր հայտարարել են Սիրիական Ազգային կոալիցիա և հեղափոխական ուժեր ստեղծելու մասին։ Կոալիցիայի շտաբ-բնակարանը գտնվում է Կահիրեում, նրանք իրենց հռչակել են Սիրիայի օրինական իշխանություն և միջազգային հանրությունից դրամական միջոցներ և զենք են խնդրել՝ Ասադի ռեժիմի դեմ պայքարելու համար։
ԱԿ-ին ճանաչել են արևմտյան և արաբական մի քանի երկրներ, որոնց թվում Ֆրանսիան, ՄԹ-ն և ԱՄՆ-ը։ Միաժամանակ սիրիական մի քանի ընդդիմադիր ուժեր հայտարարել են, որ չեն ճանաչում ԱԿ-ի օրինականությունը և չեն ենթարկվում նրան։
