Ինդոնեզիայի Աչեհ նահանգում մոտոցիկլետի կին ուղևորներին արգելել են տղամարդ վարորդների հետևի նստելատեղում նստել հեծյալի դիրքով՝ բացված ոտքերով։ Լհոկսյոմավեի քաղաքապետի խոսքով՝ այդ արգելքն ընդունվել է բարոյական վարքագծի նկատառումներով։
Քաղաքապետի խոսքով՝ լայն բացված ոտքերով նստած կանայք նմանվում են տղամարդկանց, իսկ կողքի նստած դիրքը կանացիություն է հաղորդում: Բացի դրանից՝ այդ դիրքից մարդիկ քիչ են վայր ընկնում։
Նահանգի բնակիչներին բացիկներ են ուղարկվել՝ տեղեկացնելու նոր օրենքի մասին։ Աչեհը Ինդոնեզիայի միակ նահանգն է, որտեղ գործում է Շարիաթը։
Քաղաքապետն ասել է, որ օրենքն ուժի մեջ մտնելուց հետո հեծյալի կեցվածքով նստող կանայք կպատժվեն։
Մուսուլմանական ակտիվիստ Ուլիլ Աբշար Աբդալլահը, որն ապրում է Ջակարտայում, քննադատել է նոր օրենքը։ Twitter-ի իր էջում նա գրել է, որ Շարիաթի օրենքները չեն արգելում կանանց բացված ոտքերով մոտոցիկլետի վրա նստել, Ղուրանում այդպիսի բան գրված չէ։