Երեկ ՀՀ ԿԸՀ-ում ավարտվեց ՀՀ նախագահի թեկնածուների առաջադրման փաստաթղթերի ընդունումը: Սակայն ընտրագրավի վճարման անդորրագրերը ԿԸՀ չեն ներկայացրել ութ թեկնածու: Դեռևս գրավ չվճարած թեկնածուներն են` անկուսակցական, կարատեիստ Տարոն Աբրահամյանը, անկուսակցական գործազուրկ Ռոբերտ Ահարոնյանը, Մարդու իրավունքների Եվրադատարանի փաստաբան Ռուբեն Այվազյանը, անկուսակցական գործազուրկ Մհեր Հայրապետյանը, «Ազգային համաձայնություն» կուսակցության ղեկավար Արամ Հարությունյանը, Մամուլի ազգային ակումբի տնօրեն Նարինե Մկրտչյանը, անկուսակցական թոշակառու Պավլիկ Սարգսյանը, «Քաշաթաղ» հասարակական կազմակերպության ղեկավար Ռոբերտ Սիմոնյանը:
Հաշվի առնելով փաստը, որ ՀՀ նախագահի թեկնածու, էպոսագետ Վարդան Սեդրակյանն ավելի վաղ պատրաստակամություն էր հայտնել վճարել «Ժառանգություն» կուսակցության ղեկավար Րաֆֆի Հովհաննիսյանի ընտրագրավը, «Առաջին լրատվական»-ը հետաքրքրվեց՝ արդյոք չի՞ պատրաստվում ընտրագրավով սատարել այն թեկնածուներին, որոնք ընտրագրավը վճարելու միջոցներ չունեն:
Մեզ հետ զրույցում ՀՀ նախագահի թեկնածու, էպոսագետ Վարդան Սեդրակյանն ասաց, որ ընտրագրավն այնպիսի բան է, որ վճարելով թեկնածուի ընտրագրավը՝ պետք է հույս ունենաս, որ նա հինգ տոկոսի շեմը կհաղթահարի, պետք է ծանոթ լինես նրան:
«Րաֆֆի Հովհաննիսյանին առաջարկությունը ընտրագրավը վճարելու համար էր, այն էլ մարդը հրաժարվեց դրանից՝ ասելով, որ ընտրագրավի գումարն ունի, քարոզարշավի գումարը չունի: Չհասկացա, թե տարբերությունը որն է: Հետո հասկացա, որ այդ գումարն իրեն չէր մնալու: Իրեն, փաստորեն, պետք էր քարոզարշավի գումար, որի ծախսերն այնպես կարելի է ներկայացնել, որ ինչ-որ բան մնա»,- նկատեց էպոսագետը:
Նա հստակեցրեց, որ գրավը չվճարածների ցանկից հաստատ չկա մեկը, ում գրավը կվճարեր: ՀՀ նախագահի թեկնածուն նաև կանխատեսեց, որ մինչ նախագահական ընտրությունները այդ յոթ թեկնածուներից մի քանիսը՝ 2-3-ը, կհանեն իրենց առաջադրումները: Արդյունքում, ըստ նրա, ընտրապայքար կընթանա իր, ՀՀ գործող նախագահ Սերժ Սարգսյանի, «Ժառանգություն» կուսակցության ղեկավար Րաֆֆի Հովհաննիսյանի, «Ազատություն» կուսակցության ղեկավար Հրանտ Բագրատյանի և «Ազգային ինքնորոշում» միավորման նախագահ Պարույր Հայրիկյանի միջև:
