Ոստիկանությունից «Առաջին լրատվական»-ին հայտնեցին, որ դեկտեմբերի 31-ին Վանաձորում տեղի ունեցած պայթյունի դեպքի առթիվ ոստիկանության Լոռու մարզի քննչական բաժնում նախապատրաստվում են նյութեր, նշանակված են փորձաքննություններ:
Հիշեցնենք, որ նշված օրը Վանաձորի Վարդանանց 17 հասցեում գտնվող «Կոնս Ալիանս» հաշվապահական ընկերությունում պայթյուն էր տեղի ունեցել, որի հետևանքով «Ամերիաբանկ» ՓԲԸ Վանաձորի մասնաճյուղի կառավարիչ, 1976 թ. ծնված Վարդան Սարդարյանը 2-րդ և 3-րդ աստիճանի այրվածքներով ու տրավմատիկ շոկով տեղափոխվել էր Վանաձորի բժշկական կենտրոն: Գիտակից վիճակում գտնվող տուժողը բժիշկներին պատմել է, որ կրակայրիչով փորձել է ծխախոտ վառել, և ինչ-որ բան է պայթել: Բացարձակապես պատկերացում չի ունեցել, թե ինչը կարող էր պայթյունի պատճառ դառնալ, քանի որ նշված գրասենյակում ոչ մի պայթուցիկ նյութ չի եղել, գրասենյակը նույնիսկ գազիֆիկացված չէ: Հարազատների ցանկությամբ Վարդան Սարդարյանն այնուհետև տեղափոխվել է Երևանի այրվածքաբանության կենտրոն:
Չնայած որոշ լրատվամիջոցների հրապարակումներին և ԱԻՆ տարածած հաղորդագրությանը, թե Վարդան Սարդարյանը նշված տարածքում բռնկված հրդեհից է տուժել, ԱԻՆ Լոռու մարզի փրկարարական վարչության պետ Հրաչիկ Անտոնյանը «Առաջին լրատվական»-ին հավաստիացրեց, որ դեպքի վայրում հրդեհ չի եղել, և Վարդան Սարդարյանը պայթյունի հետևանքով է վնասվածքներ ստացել:
Ըստ ԱԻՆ հաղորդագրության, բժիշկները տուժողի վիճակը գնահատել են ծանր, մինչդեռ, ինչպես նրա մայրը փոխանցեց, այս պահին Վարդան Սարդարյանի վիճակը բավարար է, ամեն վայրկյան առողջության վերականգնման ուղղությամբ առաջընթաց է նկատվում: Տուժողի մայրը չցանկացավ խոսել դեպքի մանրամասներից, ասաց, որ որդին ինքը կպատմի ամեն բան:
