Այս օրերին ՊԵԿ օպերատիվ հետախուզության վարչության աշխատակիցների ուշադրության կենտրոնում են հայտնվել Լոռու մարզի Լեջան և Կաթնաղբյուր գյուղերի միջնակարգ դպրոցների` սոցվճարների մասով առաջացած պարտքերը: Այս մասին ասվում է ՊԵԿ այսօր տարածած հաղորդագրությունում:
«Կուտակած պարտքերի պատճառները ճշտելու նպատակով վարչության աշխատակիցներն օպերատիվ-հետախուզական միջոցառումներ են ձեռնարկել, որոնց արդյունքում պարզվել է, որ պարտադիր սոցվճարի մասով պարտքը դպրոցում առաջացել է կրթօջախի հաշվապահ, Ստեփանավանի բնակչուհի Լիլիա Ներսիսյանի հանցավոր արարքի հետևանքով:
Վերջինս, 2009-ի փետրվարից մինչև 2010-ի սեպտեմբերը Կաթնաղբյուրի դպրոցի պարտադիր սոցվճարների գումարներից փոխանցել է բանկում բացված իր անձնական հաշվին` մեկուկես տարվա ընթացքում ընդհանուր առմամբ շուրջ մեկուկես միլիոն դրամ, որը Լ.Ներսիսյանն օգտագործել է անձնական կարիքները հոգալու նպատակով:
ՊԵԿ օպերատիվ խումբը զուգահեռ նաև այլ տեղեկություն է ստացել, ըստ որի Լ.Ներսիսյանի դուստրը` Ստեփանավանի բնակչուհի Հասմիկ Բարոյանը ձևակերպված է Լեջանի միջնակարգ դպրոցում որպես հաշվապահ, սակայն հաշվապահությունը փաստացի վարել է նրա մայրը:
Այս դեպքում ևս վերջինս նույն եղանակով յուրացրել է պետական գումարները, ինչի հետևանքով Լեջանի դպրոցում նույնպես 2010-ի նոյեմբերին պարտադիր սոցվճարների մասով շուրջ 360 հազար դրամի ապառք է գոյացել:
Փաստի առթիվ ստեղծված նյութերն ուղարկվել են ՊԵԿ հետաքննության վարչություն` հետագա ընթացքը որոշելու նպատակով»,- ասված է հաղորդագրությունում:
