ԱԺ պատգամավոր Հեղինե Բիշարյանը այսօր էներգետիկայի և բնական պաշարների փոխնախարար Արա Սիմոնյանին ԱԺ-ում բյուջեի նախագծի քննարկումների շրջանակներում հարց ուղղեց, թե որքա՞ն արտադրանք է տալիս ատոմակայանը, արդյոք չի՞ կարծում, որ 80 օր չաշխատելու պատճառաբանությամբ իրավունք չունեին էլեկտրաէներգիայի սակագինը բարձրացնել: Բացի դրանից՝ նա նշեց, որ որոշ հիմնարկ-ձեռնարկություններ, օբյեկտներ, որոնք որոշակի անձանց են պատկանում, որոնց տերերը հայտնի մարդիկ են, ունեն «լևի» գծեր: «Մենք տարիներ շարունակ գիտենք, թե համայնքներում որքան կորուստներ կան, հնարավոր չէ՞ արդյոք այնպիսի գործիքակազմ ձևավորել, որ անկախ նրանից, թե ովքեր են «լևի» գծերի վրա նստածները, նրանց հայտնաբերել»:
Արա Սիմոնյանը նկատեց, որ ոչ թե ամբողջ ատոմայականը կանգնեց, այլ մեկ գեներատորը: «Խոսքը վերաբերում է տեխնիկական խնդիրներին, որոնք պլանային վերանորոգման աշխատանքները սկսելուց առաջ մասնագետները չէին կարողացել կանխատեսել: Այս տարվա պլանավորման աշխատանքները կատարելիս շատ ավելի մեծ ծավալով աշխատանքներ կանխատեսվեցին, և հույս ունենք, որ չի կրկնիվի»,- ասաց նա: Ինչ վերաբերում է կորուստներին, ըստ փոխնախարարի, այստեղ կա և՛ տեխնիկական, և՛ սուբյեկտիվ խնդիր: Տեխնիկական կողմը կապված է համապատասխան որակական ցուցանիշներով հաշվիչների տեղադրման հետ: «Մենք այսօր մինչև 35 կիլովոլտ լարման շղթաներում տեղադրել ենք էլեկտրոնային հաշվիչներ, որոնք բացառում են մարդկային միջամտությունը, և այդ մասերով բոլոր խոշոր սպառողների մոտ մենք կանխարգելել ենք: Ինչ վերաբերում է թե դուք ունեք որոշակի տեղեկություններ «լևի» գծերի վերաբերյալ, պետք է խնդրեմ մեկ-երկու փաստեր կոնկրետ ներկայացնել, միասին փորձենք մեր իրավասությունների շրջանակներում որոշակի հասարակական հնչեղությամբ լուծումեր տալ»,- ասաց նա` հավելելով, որ ձախ գծեր ունեցողների վերաբերյալ նման տեղեկատվություն չունի:
Հեղինե Բիշարյանը զայրացավ. «Եթե կարծում եք, որ պետք է գործ տամ որոշակի մարդկանց վերաբերյալ, Դուք սխալվում եք: Եթե կառավարությունը վիրահատություն կատարի՝ ձեր ամբողջ էներգետիկայի նախարարության աշխատակիցներից սկսած, և նշանակի պրոֆեսիոնալների, ես կհասկանամ, որ մտահոգված են խնդրի լուծման ուղղությամբ: Երկու ամիս հետո ասում եք, թե նորից տեղի է ունեցել տեխնիկական վթար, որի վերականգնումը երկու ամիս կտևի, նորից կբարձրացնեք: Ողբերգություն է, երբ համապատասխան գերատեսչությունը չի երաշխավորում ատոմակայանի անվտանգ աշխատանքը: Տեխնիկական խնդիրը նույնպես խնդիր է, որի արդյունքում դուք իմ գրպանին եք խփել»:
