ԱԺ պատգամավոր Կարինե Պողոսյանն այսօր «Առաջին լրատվականի» հետ զրույցում չհերքեց, որ ամուսինն աշխատում է Հովիկ Աբրահամյանին պատկանող բիզնեսներում: «Իմ ամուսինը Արտաշատի բնակիչներից մեկն է, որը իրավունք ունի աշխատելու»,- մեր հարցին ի պատասխան ասաց Կ. Պողոսյանը: Մեր դիտարկմանը, թե, փաստորեն, իր ամուսինն աշխատում է հենց Հովիկ Արբրահամյանի բիզնեսներում, պատգամավորը հակադարձեց. «Ինչ է, չի՞ կարելի: Ինձ թվում է՝ այդ իրանունքն ունի յուրաքանչյուր ոք՝ պայմանագիր կնքելու գործատուի հետ և աշխատելու»։
Hetq.am-ը վերջերս գրեց, որ Արտաշատում բացվել է քաղաքի ամենամեծ բիզնես կենտրոնը՝ «Արտաշատ պլազան», որի սեփականատերը վարչապետ Հովիկ Աբրահամյանի որդին է՝ Արգամ Աբրահամյանը: Կենտրոնի բարեկարգման աշխատանքներում ներգրավված է նաև Հովիկ Աբրահամյանի մորաքրոջ թոռնուհու՝ ԱԺ պատգամավոր Կարինե Պողոսյանի ամուսինը՝ Ռոբերտ Գասպարյանը: Առևտրի կենտրոնի առաջին հարկում լինելու է մեծ սուպերմարկետ, երկրորդ հարկում՝ հագուստի և այլ իրերի տաղավարներ:
«Դալար Բարդի» ՍՊԸ-ին է պատկանում Արտաշատի կենցաղի տունը: 2012 թ. ՍՊԸ-ի 100% սեփականատեր է դարձել Արգամ Աբրահամյանը: Ընկերության կանոնադրական կապիտալը կազմում է 31.3 միլիոն դրամ: «Դալար Բարդի» ՍՊԸ-ի տնօրենի պաշտոնը վստահվել է ԱԺ պատգամավոր Կարինե Պողոսյանի ամուսնուն՝ Ռոբերտ Գասպարյանին:
