ՄԱԿ-ի մանկական հիմնադրամը կոչ է արել դադարեցնել Կենտրոնական Աֆրիկայի Հանրապետությունում երեխաներին կոնֆլիկտի մեջ ներգրավելը։ ՅՈՒՆԻՍԵՖ-ի տվյալներով՝ ԿԱՀ-ում դեկտեմբերին մոտ 2,5 հազար երեխա՝ և՛ աղջիկներ, և՛ տղաներ, ներգրավվել են զինված հակամարտությունների, ինչպես նաև ինքնապաշտպանական խմբերի ձևավորման մեջ:
ՄԱԿ-ի մանկական հիմնադրամը` ՅՈՒՆԻՍԵՖ-ը, Կենտրոնական Աֆրիկայի Հանրապետությունից պահանջել է անմիջապես դադարեցնել երեխաների ներգրավումը զինված հակամարտություններին: Այս մասին ուրբաթ օրը կայացած ճեպազրույցի ժամանակ հայտարարել է համաշխարհային կազմակերպության ներկայացուցիչ Մարտին Նեսիրկին:
Վերջին ամսվա ընթացքում «Սելեկի» խմբավորման ներկայացուցիչները, ովքեր ցանկանում են պաշտոնանկ անել գործող նախագահին, իրենց վերահսկողության տակ են վերցրել մի քանի խոշոր բնակավայրեր և առաջ են շարժվել դեպի մայրաքաղաք: Երկրում տիրող անկայուն վիճակի համար այնտեղ են մեկնել Կոնգոյի և Չադի 120 զինծառայողներ, հավելյալ ռազմական կոնտինգենտ Ֆրանսիայից: Իսկ ԱՄՆ–ը Չադ է ուղարկել ավելի քան 50 զինծառայողի, որպեսզի Կենտրոնական Աֆրիկայի Հանրապետությունից անվտանգ դուրս բերեն ԱՄՆ քաղաքացիներին և դեսպանության աշխատակիցներին:
