«Հայոց Արծիվներ» հայրենասիրական հասարակական կազմակերպությունը, որդեգրելով ազգային-պետական-հայրենասիրական գաղափարախոսությունը, «Հայոց Պետականություն, Ազգային Բանակ, Հայոց Նախագահ» կարգախոսը, սկսել է խոշոր միջոցառումների շարք նվիրված Հայաստանի Հանրապետության Անկախության 20-րդ տարեդարձին, որոնք նախատեսվում է անցկացնել ՀՀ ՊՆ հինգ բանակային զորամիավորումների զորամասերում, մարզկենտրոններում և գյուղական մեծ համայնքներում:
Այսօր միջոցառումների շարքը սկսվեց ՊՆ 5-րդ բանակային կորպուսից, որտեղ հավաքվել էին «Հայոց Արծիվների» 56 գրասենյակներից ժամանած 1100 անդամներ` մասնակցելու ռազմահայրենասիրական խոշոր ծրագրին` ծանոթացում զինվորի առօրյային, զինտեխնիկային, կրակային պատրաստվածություն: ՊՆ 5-րդ բանակային կորպուսում միջոցառումների շարքը սկսվեց ՀՀ անկախության 20-րդ տարեդարձին նվիրված շնորհավորական ելույթներով, հուշամեդալների և թանկարժեք նվերների պարգևատրություններով: ՀՀ սպորտի և երիտասարդության հարցերի փոխնախարար Խաչիկ Ասրյանը խիստ կարևորում է նման ռազմահայրենասիրական ծրագրերի իրականացումը:
«…«Հայոց Արծիվների» կողմից իրականացվող ռազմահայրենասիրական հերթական միջոցառումների շարքը հիմնականում ուղղված է հայոց անկախության 20-րդ տարեդարձին, որը լուրջ խթան է հանդիսանում, որպեսզի յուրաքանչյուր հայ մարդ, հայ ընտանիք շատ լավ գիտակցի հայրենասիրության, ռազմահայրենասիրության քարոզչության կարևորությունը, դերն ու նշանակությունը հայ հասարակության, հայ ընտանիքների մեջ, որպեսզի յուրաքանչյուր հայ մարդ, հայ ընտանիք շատ լավ գիտակցի, որ ինքն է հաղթանակած պետության, հաղթանակած բանակի հաղթանակած քաղաքացին և զինվորը, որպեսզի յուրաքանչյուր հայ մարդ, հայ ընտանիք շատ լավ գիտակցի հայկական բարձրավանդակի աշխարհագրական դիրքը և յուրաքանչյուր հայ մարդ, հայ ընտանիք շատ լավ գիտակցի հորինված ադրբեջանական ցեղի ցեղապետների ամենօրյա ռազմատենչ հայտարարությունների վտանգը և յուրաքանչյուր հայ մարդ, հայ ընտանիք իր լուրջ դերակատարությունը հասարակական հիմունքներով ունենա հայոց պետականության հզորացման գործընթացներում` միշտ լինելով միասնության տանիքի տակ, իսկ միասնության տանիքը հայոց ազգային բանակն է, հայոց Նախագահն է, Հայաստանի Հանրապետությունն է: Կրելով մեր մեջ եռամիասնության արժեքային համակարգը` այսօր ավելի, քան երբևէ մենք կլինենք ավելի ուժեղ, ավելի հզոր, ավելի միասնական, այդ ժամանակ ես կասեմ Ձեզ. կեցցե՜ք դուք, կեցցե՜ հայոց ազգային բանակը, կեցցե՜ հայոց Նախագահը, կեցցե՜ Հայաստանի Հանրապետությունը», – իր ոգեշունչ ելույթում նշում է Խաչիկ Ասրյանը:
Ըստ «Հայոց Արծիվների» առաջնորդ Խաչիկ Ասրյանի, «Հայոց Արծիվների» գործունեության 1-ին փուլը` կայացման փուլը իրականացվել է մեծ հավատքով, վճռականությամբ, աշխատասիրությամբ և այն կարելի է համարել ավարտված: «Հայոց Արծիվների» գործունեության հաջորդ փուլը Կազմակերպության համար լինելու է զարգացման, հզորացման գործընթացների փուլ. նոր մասնաճյուղերի հիմնադրում, հայրենասիրական բազմաբովանդակ միջոցառումների կազմակերպում, 3,000 ակտիվ անդամներով համալրված կազմակերպության օպերատիվ խմբի, կամ «Հայոց Արծիվներ» գնդի ստեղծում և այլն:
«Հայոց Արծիվների» կողմից կազմակերպվող հայրենասիրական միջոցառումների շարքը, որոնք նվիրված են Հայաստանի Հանրապետության անկախության 20-րդ տարեդարձին, իրականացվում է Հայաստանի Հանրապետության Նախագահ Սերժ Սարգսյանի բարձր հովանու ներքո:
Զորամասում տեղի ունեցավ տոնական շքերթ, որին մասնակցում էր նաև «Հայոց Արծիվների» գունդը` 1100 անդամներով, որից հետո «Հայոց Արծիվների» գունդը մեկնեց զորավարժարան, որտեղ էլ «արծիվները» իրականացրին «կրակային պատրաստվածություն» միջոցառումը:
«Հայոց Արծիվներ»
