Երեկ Արցախի Ազգային ժողովում տեղի ունեցավ ՀՀ ԱԺ արտաքին հարաբերությունների հանձնաժողովի արտագնա նիստը:
Նախատեսվում էր, որ նիստի օրակարգում պետք է լինի նաև ՀՀ ԱԺ «Ժառանգություն» խմբակցության պատգամավոր Զարուհի Փոստանջյանի հեղինակած՝ «Լեռնային Ղարաբաղի և Հայաստանի Հանրապետությունների անվտանգության ապահովման ռազմաքաղաքական հիմնադրույթների հայեցակետերի մասին» ՀՀ ԱԺ որոշման նախագիծը:
Բացի Հայաստանի և Արցախի արտաքին հարաբերությունների հանձնաժողովի պատգամավորներից՝ նիստին հրավիրված էին նաև ԼՂ անկախ պատգամավոր Վահան Բադասյանը և մի քանի մտավորականներ, որոնց, սակայն, թույլ չեն տվել ներկա գտնվել նիստին:
«Առաջին լրատվական»-ի հետ զրույցում Վահան Բադասյանն ասաց, որ ըստ էության որևէ օրենք չի խախտվել, քվեարկվել և ձայների մեծամասնությամբ է որոշվել, որ նիստը պետք է փակ անցնի, բայց նրա տպավորությամբ՝ ներկաները նախագծի վերաբերյալ ժխտողական տրամադրվածություն ունեին:
«Այնպես չէ, որ ընդհանրապես նիստին թույլ չեն տվել ներկա գտնվել, մենք համատեղ նիստ ենք անցկացրել՝ Արցախի պատգամավորներով և ՀՀ Ազգային ժողովի արտաքին հարաբերությունների հանձնաժողովի պատգամավորներով: Հանձնաժողովում առաջարկություն եղավ դռնփակ նիստ անել՝ առաջարկի հեղինակը Ալեքսանդր Արզումանյանն էր: Հանձնաժողովն էլ ձայների մեծամասնությամբ հավանության արժանացրեց այդ առաջարկը: Իրենք Ազգային ժողովի կանոնակարգից դուրս չեն եկել»,- ընդգծեց Բադասյանը:
Պատգամավորի խոսքերով՝ այդ օրինագի հետ կապված այլ քննարկումներ չեն եղել. «Սա շատ կարևոր հարց է Ղարաբաղի համար: Մենք այն ժամանակ որոշումներ էինք ընդունել ոչնչացնել այն կրակահերթերը, որոնք շրջապատում էին Արցախը, ոչնչացնում մեր բնակավայրերը: Այդ կրակակետերը որոշում էինք ոչնչացնել ու ազատագրել, որովհետև դրանք կրահերթեր էին, որտեղից մեզ խփում էին: Գնացել ենք 15-20 կմ սահման, որ մեր անվտանգությունն ապահովենք, ու այդպիսով աշխարհին ցույց ենք տվել, որ ագրեսիա չենք կիրառում: Այդ հարցը լուծվում էր միայն Արցախում, իսկ պաշտոնական Երևանը միշտ դեմ էր մեր այդ որոշումներին: Ես Փոստանջյանին ասել եմ՝ Արցախին վերաբերող կարևոր հարցերը պետք է քննարկվեն միայն Արցախում, իսկ Հայաստանի պատգամավորները առարկեցին, նրանք որոշ հարցերի դեմ են»,- նկատեց Վ. Բադասյանը:
Մեր զրուցակիցն ավելացրեց, որ Ղարաբաղը սուբյեկտից օբյեկտի է վերածել Հայաստանի երկրորդ նախագահը. «Դա հաստատ չէր բխում հայկական պետականության շահերից և ոչ էլ Արցախի շահերից: Նա իր անձնական նեղ շահերից ելնելով այդպիսի քայլի գնաց, իսկ երրորդ նախագահն էլ շարունակում է նրա այդ քաղաքականությունը: Հրադադարի պայմանագրի համաձայն՝ Արցախը բանակցությունների լիարժեք կողմ է, և Զարուհի Փոստանջյանի նախագծի առաջին կետով՝ Հայաստանը պետք է ճանաչի Արցախի անկախությունը, այդպիսով Հայաստանի դիվանագիտական ողջ կազմն ընկնում է կրակը: Իսկ եթե Արցախը սուբյեկտ լիներ այս հակամարտության մեջ, ապա նման խնդիր չէր առաջանա: Այս ձևաչափով այսօրվա պայմաններում, կարծում եմ, Արցախի անկախությունը չի կարող ճանաչվել»:
Վահան Բադասյանի խոսքերով՝ այս նախագծի վերաբերյալ ժխտողական տրամադրվածություն ունեցել են գրեթե բոլորը. «Ուղղորդված ժխտողականություն է և ոչ թե տրամադրված ո փաստարկված»:
Հարցին՝ արդյոք այդ ուղորդվածությունը պաշտոնական Երևանի՞ց է գալիս, մեր զրուցակիցը պատասխանեց. «Երևի ընդդիմության ներկայացուցիչներն էլ կային, նրանց էլ իրենց խմբակցություններն էին այդպես ուղղորդել: Նույնիսկ կարելի է ասել «Ժառանգություն»-ը կողմ չէ, միայն Զարուհի Փոստանջյանն է կողմ»,- եզրափակեց Վահան Բադասյանը:
