Նավթի համաշխարհային գինը հունիսից ընկել է 25 տոկոսով, իսկ այս շաբաթ գինը մեկ բարելի դիմաց ԱՄՆ բորսաներում հասել է վերջին 4 տարում բացասական ռեկորդի՝ 79.8 դոլարի: Այս ասին The Wall Street Journal-ում գրում է Ջորջթաունի համալսարանի՝ Եվրասիայի, Ռուսաստանի և Արևելյան Եվրոպայի հարցերով հետազոտությունների կենտրոնի պրոֆեսոր Բրենդա Շաֆերը:
«Արևմտյան բարձրաստիճան շատ քաղաքական գործիչներ բավարարված են դրանով՝ հուսալով, որ գների կտրուկ անկումը կխափանի նավթից կախում ունեցող վտանգավոր խաղացողների հավակնությունները, ինչպիսիք են, օրինակ, Վլադիմիր Պուտինն ու Իրանը»,- գրում է հոդվածագիրը:
Հետազոտողը չի բացառում գների նվազման բացասական հետևանքները: «Երբ նավթի գինը զգալիորեն փոփոխվում է, դա իր հետ բերում է տնտեսական և աշխարհաքաղաքական հետևանքների շարք»,- ասվում է հոդվածում:
«Չնայած որոշ պետություններում առկա է սոցիալական անկայունության ռիսկ, եթե նրանք սիպված լինեն կրճատել սուբսիդիաները նավթի նվազող գների պատճառով, Ռուսաստանը չի մտնում ամենախոցելի երկրների թվում»,- կարծում է հետազոտողը:
Ռուսաստանն ունի մեծ ռեսուրսներ իր Կայունացման հիմնադրամում, որոնք գնահատվում են 177 մլրդ դոլար՝ ապահովելու սոցիալական և պետական ծառայությունները, մինչդեռ Իրանին, որը բախվում է հասարակական մեծ դժգոհության հետ և ունի ավելի համեստ ֆինանսական պահուստներ, կարող են ավելի զգալի մարտահրավերներ սպասվել:
Նավթի գների անկման ևս մեկ հետևանք կդառնա այն, որ նավթ արտահանողների մեծ մասը կդիմեն իրենց կայունացման հիմնադրամների միջոցներին՝ բյուջետային ծախսերը ծածկելու համար:
Հոդվածագիրը նշում է՝ քանի որ նման հիմնադրամների ներդրումների մեծ մասը գտնվում է այդ երկրների սահմաններից դուրս, այդ հարստության տեղաշարժը կազդի համաշխարհային շուկաների վրա, որովհետև կապիտալի զգալի զանգվածներ կվերադառնան սկզբնաղբյուր:
Հոդվածագրի խոսքով՝ չնայած նավթի գների անկումը կզրկի Մոսկվային ռեսուրսներից, որոնք անհրաժեշտ են ռազմական ներխուժումների ընդլայնման համար, հավանաբար Ռուսաստանը կշարունակի ծածուկ միջամտել հարևան երկրների գործերին, ինչպես դա տեղի ունեցավ, երբ նա տնտեսական ռևանշով սպառնաց Մոլդովային այն բանից հետո, երբ երկիրը ստորագրեց ԵՄ-ի հետ Ասոցացման համաձայնագրը:
Նավթի ընկնող գների ազդեցությունը Ռուսաստանի և Իրանի նկատմամբ տնտեսական պատժամիջոցների վրա կլինի ոչ միանշանակ՝ կարծում է պրոֆեսորը:
Նա հավելում է, որ պոտենցիալ ազդեցությունը գնահատելու համար կարևոր է հիշել, որ տնտեսական անկումը միշտ չէ, որ մեղմացնում է երկրի վարքն արտաքին քաղաքականության հարցերում:
